ხულოს მუნიციპალიტეტის გამგეობა სოფლების – წაბლანისა და ვერნებისთვის ორ გადასატან, კარკასული კარვის ასაწყობ მასალას ყიდულობს. მასალის შესაძენად გამგეობამ გამარტივებული ელექტრონული ტენდერი აუქციონის გარეშე 12 345 ლარზე 4 ნოემბერს გამოაცხადა. ტენდერი 10 ნოემბერს დასრულდა.
ხულოს მუნიციპალიტეტის გამგეობის შესყიდვების სამსახურის უფროსი, ელდარ ბოლქვაძე განმარტავს, რომ კარვებს ვერნებსა და წაბლანისთვის ყიდულობენ მოსახლეობის მოთხოვნით – „სოფლის მხარდაჭერის პროგრამის“ ფარგლებში. გამგეობამ ტენდერში გამარჯვებულ შპს „იმპექსთან“ ხელშეკრულება 22 ნოემბერს გააფორმა.
შესყიდვების ეროვნული სააგენტოს ვებგვერდზე გამოქვეყნებული სატენდერო პირობების მიხედვით, გამარტივებულ ელექტრონულ ტენდერში გამარჯვებულმა კომპანიამ გამგეობას პრიალა, წყალგაუმტარი, ლურჯი ან მწვანე ფერის გადაკეცილი კიდეებითა და სპეციალურად დამაგრებისთვის საჭირო ნახვრეტებით, არანაკლებ 20 კვადრატი კარკასული კარავი ხელშეკრულების გაფორმებიდან 20 დღეში უნდა მიაწოდოს. კარავს ერთწლიანი გარანტია უნდა ჰქონდეს.
სოფელი წაბლანა ფუშრუკაულის თემში შედის. ფუშრუკაულის თემის რწმუნებული ომარ აბაშიძე ამბობს, რომ სოფელში სარიტუალო შენობა არ აქვთ, კარკასულ კარავს კი მოსახლეობა სარიტუალოდ გამოიყენებს.
„მართალია, ქორწილს სოფელში არავინ აკეთებს, მაგრამ კარავს ტირილის დროს გამოვიყენებთ, სოფლისთვის ხელსაყრელია. ამ დრომდე კარავს სოფელ ძმაგულადან ვთხოულობდით, მალე საკუთარიც გვექნება. საჭირო ინვენტარი უკვე შევიძინეთ“, – ამბობს ომარ აბაშიძე. – „სოფლის მხარდაჭერის პროგრამით“ სოფელ წაბლანასთვის 14 000 ლარი იყო გამოყოფილი. აქედან ნაწილი თანხით ინვენტარს ვყიდულობთ, ნაწილი კი კარვის შეძენას მოხმარდება“.
„კარავი 300 ადამიანს დაიტევს, ინვენტარსაც ამდენ ადამიანზე ვყიდულობთ“, – ამბობს სხალთის რწმუნებული რაულ მახარაძე.
ხულოს გამგეობამ კარვის შესაძენად ტენდერი მეორედ გამოაცხადა – 2 ნოემბერს გამოცხადებული ტენდერი დოკუმენტაციაში არსებული უზუსტობის გამო შეწყდა.
