ბათუმის საკრებულო 2 დეკემბერს რიგგარეშე სხდომაზე განიხილავს ზაურ ახვლედიანის პირად განცხადებას – საკრებულოს წევრის უფლებამოსილების შეწყვეტის შესახებ.
რესპუბლიკელი ზაურ ახვლედიანი აჭარის უმაღლესი საბჭოს თავმჯდომარის კაბინეტის უფროსად ინიშნება. სატელეფონო ზარს თავად ზაურ ახვლედიანი არ პასუხობს, თუმცა ეს ინფორმაცია დაგვიდასტურა აჭარის უმაღლესი საბჭოს თავმჯდომარემ, დავით გაბაიძემ: „დღეს-ხვალ მივიღებთ საბოლოო გადაწყვეტილებას. ჩვენ შევთავაზეთ მას ეს პოზიცია და თანხმობა მივიღეთ“.
ზაურ ახვლედიანმა ნოემბრის დასაწყისში დატოვა „რესპუბლიკური პარტიის“ ბათუმის ორგანიზაციის თავმჯდომარის პოსტი. მაშინ მან არც ის გამორიცხა, რომ შესაძლოა „რესპუბლიკელებიც“ დატოვოს.
ზაურ ახვლედიანის ნაცვლად ბათუმის საკრებულოში ლალი ანდღულაძე შევა. ის თვითმმართველობის არჩევნების დროს, კოალიცია „ქართული ოცნების“ სიის „რესპუბლიკელების“კვოტით გათვალისწინებული მორიგი კანდიდატი იყო. ლალი ანდღულაძე ბათუმის სახელმწიფო უნივერსიტეტის ლექტორია. ამის შესახებ „ბათუმელებს“ თემურ ყურაშვილი ესაუბრა, ბათუმის საკრებულოს წევრი „რესპუბლიკური პარტიიდან“.
