დღეს, 25 ნოემბერს, ბათუმის საკრებულოში ბათუმის მერიის 2017 წლის ბიუჯეტის პროექტის განხილვა მოეწყო. როგორც შეხვედრაზე აღინიშნა ბათუმის მომავალი წლის ბიუჯეტი 139 590 000 ლარით განისაზღვრა. განხილვაში მონაწილეობდა როგორც მერიის, ისე არასამთავრობო ორგანიზაციების წარმომადგენლები და უშუალოდ მოქალაქეები.
“სამოქალაქო საზოგადოების ინსტიტუტის” ბათუმის ოფისის ხელმძღვანელის ნათია აფხაზავას თქმით, ბიუჯეტის პროექტში, რამდენიმე მნიშვნელოვანი მიმართულებაა გამორჩენილი, რისთვისაც მომავალი წლის ბიუჯეტში დამატებიტი რესურსების გამოყოფაა საჭირო – “ყველაზე მნიშნვნელოვანი საკითხი, რაც ჩვენ ვფიქრობთ რომ არის თვითმმართველობისთვის ახალი უფლებამოსილება, ადგილობრივი კულტურული მემკვიდრეობის ძეგლების დაცვა და მოვლა-პატრონობაა. ამ კუთხით 2017 წლის ბიუჯეტის პროექტში თანხა არ არის გაწერილი. მაშინ როდესაც „შპს ჯეოგრაფიკმა“ დადო დასკვნა არაერთი ძეგლის რეაბილიტაციის აუცილებლობის შესახებ, ასევე ზოგადად სისტემის შექმნის შესახებ, კულტურული მემკვიდრეობის დაცვის ჭრილში, აუცილებელია 2017 წელს იქნეს თანხა გათვალისწინებული ამ კუთხითაც“ – ამბობს ნათია აფხაზავა
მისივე თქმით, კიდევ ერთი მნიშვნელოვანი მიმართულება, რაც “სამოქალაქო საზოგადოების ინსტიტუტის” რეკომენდაციით, უნდა იყოს გათვალისწინებული ბათუმის მერიის მომავალი წლის ბიუჯეტში შემოერთებულ ტერიტორიებზე ინფრასტრუქტურული პროექტების ხარჯია – “მართალია გზების რეაბილიტაციის კუთხით გათვალისწინებულია არაერთი პროექტი, მაგრამ საგანგაშო მდგომარეობაა ახალ შემოერთებულ ტერიტორიებზე: კახაბერი, გონიო კვარიათის მონაკვეთზე, სადაც მოსახლეობა აქტიურად ითხოვს, რომ მოხდეს შიდა გზების რეაბილიტაცია” – ამბობს ნათია აფხაზავა.
ბათუმის საქრებულოს თავმჯდომარის მოვალეობის შემსრულებლის, ლაშა სირაბიძის განმარტებით კულტურული მემკვიდრეობის შესანარჩუნებლად კონკრეტული პროექტები არ არსებობს ბათუმის თვითმმართველობაში – „რომლის საფუძველზეც შესაძლებელი იქნებოდა თანხის გათვალისწინება. ამ მიმართულებით მიმდინარეობს მუშაობა და როდესაც იქნება კონკრეტული პროექტი და სახარჯთაღრიცხვო ნაწილი ამ პროექტისა, ცნობილი იქნება თანხა და რა თქმა უნდა მერე შეგვეძლება ბიუჯეტში გათვალისწინებაზე საუბარი. თუმცა უნდა აღინიშნოს რომ ის სამუშაოები საკმაოდ მასშტაბურია და რამდენად შევძლებთ გავიტავლისწინოთ ამ პროექტების სრულად დაფინანსება, დამოკიდებული იქნება ისევ და ისევ ბიუჯეტის საშემოსავლო რესურსზე“ – ამბობს ის.
