Batumelebi | ვარძიის კონსერვაციის პროექტმა „ევროპა ნოსტრას“ ჯილდო მიიღო ვარძიის კონსერვაციის პროექტმა „ევროპა ნოსტრას“ ჯილდო მიიღო – Batumelebi
RU | GE  

ვარძიის კონსერვაციის პროექტმა „ევროპა ნოსტრას“ ჯილდო მიიღო

დღეს, 25 მაისს, ევროკომისიამ და ევროპა ნოსტრამ კულტურული მემკვიდრეობის სფეროში ევროპის უმაღლესი აღიარების – ევროპული მემკვიდრეობის პრიზის / ევროპა ნოსტრას ჯილდოს 2021 წლის გამარჯვებულები გამოავლინა.

გამარჯვებულებს შორისაა ვარძიის კლდეში ნაკვეთი კომპლექსის პროაქტიული კონსერვაციის და მონიტორინგის სისტემის პროექტი, კატეგორიაში – კონსერვაცია.

პროექტი დააფინანსა საქართველოს მთავრობამ და ფონდმა „ქართუმ“. პროექტის პარტნიორი იყო იტალიის გეოლოგიური კვლევის ინსტიტუტი. 

2021 წლის გამარჯვებულები ონლაინღონისძიებაზე  დაასახელეს მარია გაბრიელმა, ევროკომისარი ინოვაციის, კვლევის, კულტურის, განათლებისა და ახალგაზრდობის მიმართულებით და ჰერმან პარცინგერმა, ევროპა ნოსტრას აღმასრულებელმა პრეზიდენტმა.

მემკვიდრეობის მხარდამჭერებს მსოფლიოს სხვადასხვა ქვეყნიდან საშუალება ეძლევათ ხმის მიცემით გამოავლინონ „საზოგადოების რჩეულის“ ჯილდოს მფლობელი.

საზოგადოების რჩეულის ჯილდოს გამარჯვებული გამოვლინდება ევროპული მემკვიდრეობის დაჯილდოების ცერემონიაზე, რომელიც გაიმართება 2021 წლის შემოდგომაზე. გრან-პრის მფლობელებიც ამ პერიოდში გამოვლინდებიან და თითოეული მათგანი 10 000 ევროს  მიიღებს ფულადი პრიზის სახით.

ვარძიის პროექტი ერთადერთი პროექტი არ არის საქართველოდან, რომელსაც „ევროპა ნოსტრას“ ჯილდო აქვს. 2019 წელს „ევროპა ნოსტრას“ ჯილდო მოიპოვა ციხე-სოფელ მუცოს რეაბილიტაციის პროექტმა.

„ევროპა ნოსტრა“ წარმოადგენს საზოგადოებრივი ორგანიზაციების პანევროპულ ფედერაციას, რომელსაც მხარს უჭერენ როგორც კერძო კომპანიები, ასევე საჯარო დაწესებულებები და ინდივიდები. ორგანიზაცია აერთიანებს ევროპის 40 ქვეყანას და მიზნად ისახავს ევროპის კულტურული და ბუნებრივი მემკვიდრეობის დაცვას. ევროპა ნოსტრა დაარსდა 1963 წელს და დღეისთვის იგი ყველაზე წარმომადგენლობითი ევროპული ქსელია.

________________

ფოტო: ვიკიპედია

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com