Batumelebi | ზურაბ პატარაძის და სხვების შანსები – როგორ დაკომპლექტდება აჭარის ახალი მთავრობა ზურაბ პატარაძის და სხვების შანსები – როგორ დაკომპლექტდება აჭარის ახალი მთავრობა – Batumelebi
RU | GE  

ზურაბ პატარაძის და სხვების შანსები – როგორ დაკომპლექტდება აჭარის ახალი მთავრობა

აჭარის ახალარჩეული უმაღლესი საბჭოს უფლებამოსილების ცნობის შემდეგ მთავრობის თავმჯდომარედ საქართველოს პრეზიდენტი ისევ ზურაბ პატარაძეს წარადგენს თუ სხვა კანდიდატიც განიხილება? – ამ კითხვაზე პრეზიდენტის ადმინისტრაციაში ჯერ-ჯერობით პასუხი არ აქვთ. ამბობენ რომ პრეზიდენტი საკითხს მას შემდეგ განიხილავს, რაც უმაღლესი საბჭო შეიკრიბება.

წყაროს ინფორმაციით ზურაბ პატარაძე ჯერ-ჯერობით ერთადერთი კანდიდატია, რომელიც აჭარის მთავრობის თავმჯდომარის პოსტზე განიხილება. ის რომ მასთან კონსულტაცები უკვე მიმდინარეობს, დღეს მედიასთან თავად ზურაბ პატარაძემაც დაადასტურა:

„მიმდინარეობს კონსულტაციები, რა თქმა უნდა მე შეხვედრები მქონდა ბატონ კალაძესთან და კობახიძესთანაც… “ – განაცხადა პატარაძემ მედიასთან საუბარში.

წარდგენის შემდეგ თავმჯდომარეობის კანდიდატმა უმაღლეს საბჭოს მთავრობის ახალი მინისტრთა კაბინეტი უნდა წარუდგინოს.

გიორგი თავამაიშვილი აჭარის მთავრობაში ერთადერთი მოქმედი მინისტრის მოვალობის შემსრულებლია, რომელსაც ახალ მინისტრთა კაბინეტში არ მოიაზრებენ. ამის მიზეზი კი მისი პარტიული კუთვნილებაა, გიორგი თავამაიშვილი „რესპუბლიკელია“ და თანამდებობის შესანარჩუნებლად პარტიის დატოვებასა და „ქართულ ოცნებაში“ გადასვლას არ გეგმავს.

„ჩემთვის არავის დაუსვამს კითხვა ამ მიმართულებით, მაგრამ ვიდრე მკითხავდნენ მე განვაცხადე, რომ პარტიას არ დავტოვებდი, ამიტომ მე არ მივიჩნევ ალოგიკურად, რომ იყოს საუბარი სხვა კონკრეტულ პიროვნებებზე“ – განაცხადა გიორგი თავამაიშვილმა „ბათუმელებთან“ სატელეფონო საუბარში.

გია თავამაიშვილის თქმით ის არჩევნების ერთ-ერთ ხიბლად ახალი მთავრობის დაკომპლეტების შესაძლებლობას და ახალი სახეების წარმოჩანასაც მიიჩნევს: „უკეთესს რა გამოლევს“ – ამბობს ის თუმცა კითხვაზე – ვინ არის უკეთესი? არ აკონკრეტებს და ამბობს თუ შეეკითხებოდნენ უპასუხებდა, მაგრამ ჯერ-ჯერობით არ უკითხავთ.

დაუდასტურებელი ინფორმაციით კი ამ თანამდებობაზე საკუთარ თავს აჭარის უმაღლესი საბჭოს ჯერ კიდევ მოქმედი თავმჯდომარე ავთანდილ ბერიძე მოიაზრებს.

განათლების მინისტრობა თუ არ გამოვა, მისვე თქმით, მოადგილეობაზეც არ იტყვის უარს უმაღლესი საბჭოს წევრი და „ქართული ოცნების“ ფრაქციის ყოფილი თავმჯდომარე კაკო ძნელაძე, თუმცა აცხადებს, რომ ამ მიმართულებით მასთან კონსულტაციები ჯერ-ჯერობით არ დაწყებულა.

სხვა მოქმედი მინისტრების შანსებთან დაკავშირებით კი, არა დიქტოფონთან, არამედ პირად საუბრებში აცხადებენ, რომ დარჩენილი სამი მინისტრიდან ორმა სოფლის მეურნეობისა და ფინანსთა მინისტრებმა შესაძლოა თანამდებობა შეინარჩუნონ. ჯანდაცვის მინისტრად კი არა მხოლოდ ლევან გორგილაძე, არამედ სხვა კანდიდატიც განიხილება.

კანონმდებლობით პრეზიდენტი უფლებამოსილია და ვალდებული დანიშნოს უმაღლესი საბჭოს პირველი სხდომა 30 ნოემბრამდე, ახალარჩეული უმაღლესი საბჭოს უფლებამოსილების ცნობიდან 10 დღის ვადაში კი უმაღლეს საბჭოში წარმოდგენილ პოლიტიკურ სუბიექტებთან კონსულტაციის შემდეგ, პრეზიდენტი საქართველოს მთავრობის წინასწარი თანხმობით, უმაღლეს საბჭოს დასამტკიცებლად წარუდგენს აჭარის ავტონომიური რესპუბლიკის მთავრობის თავმჯდომარის კანდიდატურას. აჭარის მთავრობის ახალი თავმჯდომარე კი უფლებამოსილია შეარჩიოს ახალი მინისტრები და წარუდგინოს უმაღლეს საბჭოს დასამტკიცებლად.

ნეტგაზეთის მასალების სხვა გამოცემებში გადაბეჭდვის წესი
ავტორი