აჭარის უმაღლესი საბჭოს თავმჯდომარის პოსტზე „ქართული ოცნება“ დავით გაბაიძის კანდიდატურას, ხოლო ვიცე-სპიკერად მერაბ კარანაძეს განიხილავს – ინფორმაციას თავად კანდიდატები ადასტურებენ.
„… დიახ ვადასტურებ, რომ განიხილება ჩემი კანდიდატურა, თუმცა გადაწყვეტილი არ არის.“ – განაცხადა დავით გაბაიძემ „ბათუმელებთან“ სატელეფონო საუბარში. უმაღლესი საბჭოს წევრად არჩევამდე დავით გაბაიძე აჭარის მთავრობის აპარატში იურიდიულ დეპარტამენტს ხელმძღვანელობდა.
ვიცე-სპიკერად მის შესაძლო დასახელებასთან დაკავშირებით ინფორმაციას მერაბ კარანაძეც ადასტურებს.
გარდა ამისა დადასტურებული ინფორმაციით განათლების კომისიის თავმჯდომარეობის კანდიდატია ლადო მგალობლიშვილი, აჭარის განათლების მინისტრის ყოფილი მოადგილე.
ადამიანის უფლებების დაცვის კომისიის თავმჯომარედ ცოტნე ანანიძე განიხილება, არჩევნებამდე ის აჭარის ტელევიზიის დირექტორის მოადგილის თანამდებობაზე მუშაობდა და პარალელურად იყო პოლიტიკური თოქ-შოუს წამყვანი.
იურიდიულ და საპროცედურო საკითხთა კომისიის თავმჯდომარედ მოიაზრებენ ნინო ჩხეტიას, უმაღლესი საბჭოს არჩევნებამდე ის აჭარის რადიოში მუშაობდა.
ეკონომიკურ კომისიას სავარაუდოდ გიორგი რომანაძეს ჩააბარებენ. არჩევნებამდე ის აჭარის საგზაო დეპარტამენტს ხელმძღვანელობდა.
ჯანდაცვის კომისიის თავმჯდომარედ აჭარის ყოფილი ჯანდაცვის მინისტრი ნუგზარ სურმანიძე მოიაზრება, ის უმაღლესი საბჭოს არჩევნებში „ქართული ოცნების“ პროპორციული სიის პირველი ნომერი იყო და მას უმაღლესი საბჭოს თავმჯდომარეობის კანდიდატადაც განიხილავდნენ.
აგრარულ და თვითმმართველობის საკითხთა კიმისიის თავმჯდომარედ ვახტანგ წულაძე განიხილება, არჩევნებამდე ის აჭარის გარემოს დაცვის სამმართველოს ხელმძღვანელობდა.
უმრავლესობის ფრაქციის თავმჯდომარე კი ირაკლი ჭეიშვილი იქნება, არჩევნებამდე ის ბათუმის საკრებულოს თავმჯდომარე იყო და პარალელურად „ქართული ოცნების“ აჭარის ორგანიზაციის თავმჯდომარედ აირჩიეს.
„ერთიანი ნაციონალური მოძრაობის“ ფრაქციას კი უმაღლეს საბჭოში ელგუჯა ბაგრატიონი უხელმძღვანელებს. ამის შესახებ ლევან ვარშალომიძემ სპეციალურ ბრიფინგზე განაცხადა.
ამ გადანაწილების მიხედვით „ქართული ოცნების“ უმრავლესობიდან უმაღლეს საბჭოში თანამდებობის გარეშე რჩებიან დავით ბაციკაძე, წინა მოწვევის უმაღლესი საბჭოს ყოფილი ვიცე-სპიკერი, დავით თედორაძე – ბათუმის საკრებულოს ყოფილი წევრი „პატრიოტთა ალიანსიდან“, ილია ვერძაძე – პროფესიული კავშირების აჭარის ორგანიზაციის ყოფილი ხელმძღვანელი და ბიზნესმენი ხვიჩა შარაშიძე.
კანონმდებლობის თანახმად ახალი უმაღლესი საბჭოს პირველი სხდომა პრეზიდენტმა 30 ნოემბრამდე უნდა დანიშნოს.
