Batumelebi | შეზღუდვები ბათუმის ქუჩებში შეზღუდვები ბათუმის ქუჩებში – Batumelebi
RU | GE  

შეზღუდვები ბათუმის ქუჩებში

ბათუმის მერიის კეთილოწყობის სამსახურის ინფორმაციით, ქალაქში მიმდინარე სარეაბილიტაციო სამუშაოების გამო სრულად არის გადაკეტილი, დემეტრე თავდადებულის ქუჩა – ბაგრატიონის ქუჩიდან ბესიკის ქუჩამდე. აღნიშნულ მონაკვეთზე როგორც  ქუჩის რეაბილიტაცია, ასევე  საკანალიზაციო სისტემის მოწყობა  მიმდინარეობს.

„რაც შეეხება, მაიაკოვსკის  ქუჩას, როგორც  ქუჩის რეაბილიტაცია ასევე სანიაღვრე და საკანალიზაციო სისტემების მოწყობა მიმდინარეობს, ამიტომ  გადაკეტილი იქნება 3-4 დღის განმავლობაში. ასევე არის შეზღუდვები ბაქოს ქუჩაზე, გოგებაშვილისა და შავშეთის ქუჩამდე მონაკვეთში. ასევე წერეთლის ქუჩაზე“ – ამბობს ბათუმის მერიის კეთილმოწყობის სამსახურის უფროსი, თენგიზ პეტრიძე,

მისივე ინფორმაციით წერეთლის ქუჩაზე მიმდინარე სარეაბილიტაციო სამუშაოების დასრულების შემდეგ,  გადაიკეტება იმედაიშვილის ქუჩა [ყოფილი „ჯორჯიაშვილი“].  წერეთლის ქუჩა სავარაუდოდ ხუთშაბათს, 24 ნოემბერს გაიხსნება.

„სხვა დანარჩენი ქუჩების შესახებ, რომლებიც გადაიკეტება ან იქნება ნაწილობრივი შეზღუდვები, ამაზე ჩვენ ეტაპობრივად გავავრცელებთ ინფორმაციას.“ – განმარტა თენგიზ პეტრიძემ.

ქუჩებზე არსებული სარეაბილიტაციო სამუშაოების გამო, „ბათუმის ავტოტრანსპორტის“  ინფორმაციით, „მცირე ცვლილებები“ შევიდა მუნიციპალური ტრანსპორტის მოძრაობის გრაფიკში – ნებისმიერ ავტობუსს, რომელიც მაიაკოვსკის ქუჩით მოძრაობს, უწევს დადიანის ქუჩაზე გადასვლა.  „ავტობუსებს საჭირო დროზე მეტი სჭირდებათ და მოქალაქეებსაც დიდხანს უწევთ ლოდინი“ – ამბობს, ბესიკ  დათიაშვილი, „ბათუმის ავტოტრანსპორტის“ მარკეტინგის მენეჯერი.

ნეტგაზეთის მასალების სხვა გამოცემებში გადაბეჭდვის წესი
ავტორი: როინ გუნდაძე