ბათუმში ქვაფენილის აყრა და, შესაბამისად, სხვადასხვა ქუჩის ჩაკეტვა გრძელდება.
ქალაქის მერიის ინფორმაციით, ამჯერად, 18 მარტიდან 1-ელ აპრილამდე, სატრანსპორტო მოძრაობა შეიზღუდება 26 მაისის ქუჩაზე – მემედ აბაშიძის გამზირიდან შოთა რუსთაველის ქუჩამდე მონაკვეთში. თუმცა 26 მაისის ქუჩაზე მოძრაობა დღეს, 17 მარტს უკვე შეზღუდულია [აბაშიძე-კლდიაშვილის მონაკვეთში.
ბათუმი, 26 მაისის ქუჩა – მემედ აბაშიძის გამზირის კვეთიდან რუსთაველის ქუჩის მიმართულებით / 17.03.2026
„შეზღუდვა დაკავშირებულია ქვაფენილიანი ქუჩების რეაბილიტაციის მიმდინარე პროექტთან“, – წერს ბათუმის მერია.
ბათუმი, 26 მაისის ქუჩა – დავით კლდიაშვილის კვეთიდან აბაშიძის გამზირის მიმართულებით / 17.03.2026
ბათუმში 15 ქვაფენილიანი ქუჩის [ქუჩების მონაკვეთების] რეაბილიტაციაზე მერიის საქალაქო ინფრასტრუქტურისა და კეთილმოწყობის სამმართველოს 2025 წელს ტენდერი 6 432 351 ლარით ჰქონდა გამოცხადებული. სამმართველომ ხელშეკრულება ტენდერში გამარჯვებულ „ბონდი-2009“-სთან 2026 წლის 28 იანვარს გააფორმა – 5 649 994 ლარზე.
აღნიშნული 15 ქუჩის ჩამონათვალში 26 მაისის ქუჩაცაა, თუმცა, ბათუმის მერიამ ამ ჩამონათვალს ჯერ კლარა ცეტკინის, შემდეგ კი მემედ აბაშიძის გამზირიც ისე დაამატა, რომ ამ ორი ქუჩის სარეაბილიტაციოდ თანხა არც ბიუჯეტშია გაწერილი და არც ცალკე ტენდერია გამოცხადებული.
ბათუმის მერია მეორე დღეა არ პასუხობს კითხვაზე, თუ რა სახსრებით და როგორ ფინანსდება სამუშაოები ცეტკინის ქუჩაზე და აბაშიძის გამზირზე. აბაშიძის გამზირზე სამუშაოებს „ბონდი-2009“ ასრულებს, რაც კომპანიაში დაგვიდასტურეს. თუმცა რის საფუძველზე და რა სახსრებით – ეს ინფორმაცია არც ამ კომპანიაში მოგვაწოდეს.
___
ამ თემაზე:
მემედ აბაშიძის გამზირზე ქვაფენილს ბათუმის მერია ტენდერის გარეშე ყრის
