რუსეთის უშიშროების საბჭოს თავმჯდომარის მოადგილე, ექსპრეზიდენტი დიმიტრი მედვედევი თავის შეფასებას აქვეყნებს პრეზიდენტ დონალდ ტრამპსა და ვლადიმერ პუტინის შეხვედრის შესახებ. მისი აზრით, ალასკაში გამართულ შეხვედრაზე რუსეთსა და აშშ-ს შორის აღდგა მაღალი დონის დიალოგის მექანიზმი. მისი თქმით, საუბარი „მშვიდ გარემოში, ულტიმატუმებისა და მუქარების გარეშე“ წარიმართა.
მედვედევის შეფასებით, რუსეთის პრეზიდენტმა აშშ-ის პრეზიდენტს პირადად და დეტალურად გააცნო მოსკოვის პირობები უკრაინაში მიმდინარე ომის დასასრულებლად.
როგორც ის ამბობს, თითქმის სამსაათიანი შეხვედრის შემდეგ თეთრი სახლის ლიდერმა „უარი თქვა რუსეთის წინააღმდეგ ზეწოლის ესკალაციაზე – ყოველ შემთხვევაში, ჯერჯერობით.“
„შეხვედრამ დაამტკიცა, რომ მოლაპარაკებები შესაძლებელია წინასწარი პირობების გარეშე და პარალელურად „სპეციალური სამხედრო ოპერაციის“ გაგრძელების ფონზეც,“ – განაცხადა მედვედევმა.
მისივე თქმით, ამ შეხვედრის მთავარი შედეგი ისაა, რომ „მომავალ მოლაპარაკებებში სამხედრო მოქმედებების შეწყვეტის შედეგზე პასუხისმგებლობა პირდაპირ დაეკისრა კიევსა და ევროპას.“
___
ალასკაში სამ საათზე მეტხანს გაგრძელდა ტრამპისა და პუტინის შეხვდრა, რომლის შემდეგაც პრეზიდნეტებმა განცხადებები გააკეთეს მედიასთან. ორივეს განცხადება იყო ზოგადი, თუმცა ცხადი გახდა, რომ შეხვედრა კონკრეტული შედეგის გარეშე დასრულდა.
