ბათუმის საკრებულომ გადაწყვიტა გენდერის სპეციალისტს სახელი გადაარქვას, პოზიციის დასახელება შეცვალოს და „ქალისა და მამაკაცის თანასწორობის სპეციალისტი“ უწოდოს. ამ გადაწყვეტილებას საკრებულოს აპარატის იურიდიული განყოფილების უფროსი ირაკლი თავართქილაძე საკრებულოს შესაბამისი დადგენილების კანონთან შესაბამისობაში მოყვანის სურვილით ხსნის.
საქმე ისაა, რომ „ოცნებამ“ კანონმდებლობიდან ტერმინი გენდერი და გენდერული იდენტობა ამოიღო. „გენდერული თანასწორობის შესახებ“ კანონს „ქალისა და მამაკაცის თანასწორობის შესახებ“ კანონი უწოდეს.
ტერმინი „გენდერის ნიშნის შეუწყნარებლობა“ შეიცვალა „ქალისა და მამაკაცის თანასწორობისადმი შეუწყნარებლობით“, კანონში გამოყენებული სიტყვები „გენდერულად მგრძნობიარე“, შეიცვალა სიტყვებით „სქესის ნიშნისადმი მგრძნობიარე“.
დადგენილების კანონთან შესაბამისობაში მოყვანის მოტივით ბათუმის საკრებულო ცვლის პოლიტიკური თანამდებობის პირებისა და საკრებულოს აპარატის პროფესიული საჯარო მოხელეების თანამდებობრივი სარგოების და საშტატო ნუსხის დამტკიცების შესახებ დადგენილებას:
„დადგენილებით დამტკიცებულ დანართში – მეორე კატეგორიის უფროსი სპეციალისტის სახელწოდება ნაცვლად – „სპეციალისტი გენდერული თანასწორობის საკითხებში“, იქნება – „მეორე კატეგორიის უფროსი სპეციალისტი ქალისა და მამაკაცის თანასწორობის საკითხებში.“
ცვლილების დამტკიცების შემდეგ ბათუმის საკრებულოს „ქალისა და მამაკაცის თანასწორობის საკითხებში“ ერთი სპეციალისტი ეყოლება და მისი ხელფასი 2628 ლარია. ეს საკითხი 31 ივლისს, სხდომაზე განსახილველი საკითხების ნუსხაშია.
ამავე თემაზე:
