საქართველოს საკონსტიტუციო სასამართლოში დღეს, 2 ოქტომბერს, განმწესებული მოსამართლეების – ირინა იმერლიშვილის,ს ფიცის დადების ცერემონიალი გაიმართა. მოსამართლეებმა ფიცი საქართველოს პრეზიდენტის, პარლამენტის თავმჯდომარისა და საქართველოს უზენაესი სასამართლოს თავმჯდომარის წინაშე დადეს.
ირინა იმერლიშვილი საქართველოს საკონსტიტუციო სასამართლოს მოსამართლედ განმწესებამდე, 2000- 2003 წლებში იკავებდა იუსტიციის მინისტრის მოადგილის პოზიციას. 2012 – 2013 წლებში იყოს საქართველოს მე-8 მოწვევის პარლამენტის წევრი, საპროცედურო და იურიდიულ საკითხთა კომიტეტის წევრი. ასევე იყო ეროვნული უშიშროების საბჭოს მდივანი.
გიორგი კვერენჩხილაძე, იკავებდა პრეზიდენტის საპარლამენტო მდივნის თანამდებობას, 2004-2007 წლებში ის საქართველოს საკონსტიტუციო სასამართლოს სამართლებრივი უზრუნველყოფისა და კვლევების დეპარტამენტის უფროსია. ასევე არის ივანე ჯავახიშვილის თბილისის სახელმწიფო უნივერსიტეტის საკონსტიტუციო სამართლის სრული პროფესორი.
თეიმურაზ ტუღუში საქართველოს საკონსტიტუციო სასამართლოს წევრად განმწესებამდე, 2006 წლიდან მუშაობდა საკონსტიტუციო სასამართლოში, 2014 წლიდან იკავებდა საკონსტიტუციო სასამართლოს სამართლებრივი უზრუნველყოფისა და კვლევების დეპარტამენტის უფროსის თანამდებობას.
ირინა იმერლიშვილი და გიორგი კვერენჩხილაძე საკონსტიტუციო სასამართლოს წევრებად საქართველოს პრეზიდენტმა 2016 წლის 10 სექტემბერს დანიშნა, თეიმურაზ ტუღუში კი უზენაესი სასამართლოს პლენუმმა 2016 წლის 20 სექტემბერს აირჩია.
„დღეს ჩვენ სამმა მოსამართლემ დავდეთ ფიცი. შემდეგ შემოგვემატება ერთი მოსამართლე, რომელიც უნდა დაამტკიცოს პარლამენტმა. პირველ ოქტომბერს ამოქმედდა ახალი პროცედურები თავმჯომარის არჩევის შესახებ, კონკრეტულად სამ მოსამართლეს აქვს უფლება ორი კვირის განმავლობაში წარადგინოს სასამართლოს თავმჯდომარე, ხოლო შემდეგ არაუგვიანეს ერთი თვისა აირჩევა ახალი თავმჯდომარე“, – განაცხადა ირინა იმერლიშვილმა ფიცის დადების შემდეგ.
ჟურნალისტების კითხვაზე, თუ როდის განახლდება გახმაურებული საქმეების – „კაბელების საქმის, “რუსთავი 2”-ის და გიგი უგულავას განხილვა, ირინა იმერლიშვილმა პასუხისგან თავი შეიკავა: „ვფიქრობ, მოსამართლე თავისი გადაწყევტილებებით უნდა ელაპარაკებოდეს საზოგადოებას. ნება მომეცით, რომ არა ტელევიზიებით, არამედ გადაწყვეტილებებით მივმართო საზოგადოებას“, – განაცხადა მან.
რაც შეეხება იმას, თუ ვინ გახდება საკონსტიტუციო სასამართლოს თავმჯდომარე, ეს საკითხი ჯერჯერობით უცნობია. ჯერჯერობით ამის გაცხადებული სურვილი მხოლოდ თავმჯდომარის მოვალეობის შემსრულებელს ზაზა თავაძეს აქვს. მისი თქმით, პრეტენზია ამ თანამდებობაზე კარგ იურისტს ყოველთვის ექნება.
საკონსტიტუციო სასამართლოს ოთხ მოსამართლეს უფლებამოსილების ვადა 30 სექტემბერს ამოეწურა – ეს მოსამართლეები არიან: კონსტანტინე ვარძელაშვილი, [თავმჯდომარის მოადგილე], გიორგი პაპუაშვილი, [თავმჯდომარე], ქეთევან ერემაძე, დავით სიჭინავა.
ფიცის დადების ცერემონიალი საკონსტიტუციო სასამართლოში
