მთავარი,სიახლეები

ბათუმის მერია მიწას მინისტადიონისა და ატრაქციონების რეკონსტრუქციის პირობით ყიდის

02.10.2016 • 2588
ბათუმის მერია მიწას მინისტადიონისა და ატრაქციონების რეკონსტრუქციის პირობით ყიდის

ბათუმის მერია მინისტადიონისა და საბავშვო ატრაქციონების რეკონსტრუქციის სანაცვლოდ ქალაქში 1 ჰექტარზე მეტ მიწის ნაკვეთებს ყიდის. მომავალი მესაკუთრის ვალდებულება იქნება ნაკვეთზე საცხოვრებელი სახლი ააშენოს. მერია მიწის ნაკვეთებს აუქციონზე ყიდის, ამდენად, მომავალი მყიდველისგან საცხოვრებელ ფართობებს არ ითხოვს.

მიწის ნაკვეთები, ერთ მისამართზე, ბათუმში, ბაგრატიონის ქ. N127-ში [რეფერალურ საავადმყოფოსთან ახლოს] მდებარეობს.

ერთი ნაკვეთი 5411 კვ/მ-ა  და მისი საწყისი საპრივატიზებო საფასურია 1 353 000 ლარი; ხოლო, მეორე ნაკვეთის ფართობია – 4956 კვ/მ და საწყისი გასაყიდი ფასი – 1 114 000 ლარი.

პირველი ნაკვეთის მყიდველი ვალდებულია ნასყიდობის ხელშეკრულების გაფორმებიდან 4 თვის ვადაში უზრუნველყოს ბათუმის მუნიციპალიტეტის საკუთრებაში არსებული, ბათუმში, თამარ მეფის გამზირი N5, N7 და N9 საცხოვრებელი სახლების მიმდებარედ არსებული ღია სპორტული მოედნის 74 804 ლარის ღირებულების კაპიტალური სარეკონსტრუქციო სამუშაოების შესრულება, არსებული კაპიტალური სარეკონსტრუქციო სამუშაოების ხარჯთაღრიცხვისა და საპროექტო დოკუმენტაციის შესაბამისად.

მეორე ნაკვეთის მყიდველი კი ვალდებული იქნება ნასყიდობის ხელშეკრულების გაფორმებიდან 3 თვის ვადაში უზრუნველყოს  ბათუმის მუნიციპალიტეტის საკუთრებაში არსებული, ბათუმში, ჯავახიშვილის ქუჩის სკვერში არსებული საბავშვო-გასართობი ატრაქციონების [მოედნის] სარეკონსტრუქციო სამუშაოების შესრულება, თანდართული ესკიზური პროქტის შესაბამისად [„ძველი ამორტიზებული ატრაქციონების დემონტაჟი და ახალი ატრაქციონების [გემი 1 ცალი, საქანელა 2 ცალი, აიწონა-დაიწონა 2 ცალი] მონტაჟი; არსებული მოედნის გაზრდა ირგვლივ დამატებითი ღობის მოწყობით და მთლიანი მოედნის პერიმეტრზე 10სმ სიმაღლის გარეცხილი ყვითელი ქვიშის მოყრა. მითითებული სარეკონსტრუქციო სამუშაოების სავარაუდო ღირებულება შეადგენს 25 000 ლარს“].

ორთავე მყიდველი ვალდებული იქნება შეძენილ ნაკვეთებზე „უზრუნველყონ მრავალსართულიანი, თანამედროვე არქიტექტურული იერსახის მქონე საცხოვრებელი სახლის/სახლების მშენებლობა“.

ორთავე აუქციონი 10 ოქტომბერს დასრულდება.

Untitled

აუქციონზე გატანილი მიწის ნაკვეთები ბათუმში / ფოტო: აუქციონის დოკუმენტაციიდან

გადაბეჭდვის წესი


ასევე: