გერმანიის კანცლერის, მერცის კანცელარიის ხელმძღვანელმა, ტორსტენ ფრეიმ რუსეთი უკრაინაში ცეცხლის შეწყვეტის მიმართ გულწრფელი ინტერესის არქონასა და დროის გაჭიანურებაში დაადანაშაულა.
„ბოლო დღეებში განსაკუთრებით ნათელი გახდა, რომ რუსეთს აბსოლუტურად არ აქვს ინტერესი იარაღი დადუმდეს. პირიქით, დრონებით თავდასხმები გაიზარდა, როგორც რაოდენობრივად, ასევე ინტენსივობით“, – ციტირებს პოლიტიკოსს გერმანული გამოცემა „დოიჩე ველე“.
ფრეის თქმით, პუტინი აშკარად წელავს დროს და ცდილობს ევროპელები და ამერიკელები ერთმანეთის წინააღმდეგ აამხედროს.
რუსეთის წინააღმდეგ ევროკავშირის სანქციების მე-17 პაკეტზე საუბრისას, ფრეიმ ხაზი გაუსვა, რომ რუსული „ჩრდილოვანი ფლოტის“, ცალკეული კომპანიებისა და აქტორების გარდა, აუცილებელია გაცილებით უფრო თამამი ზეწოლა მოხდეს რუსეთის ფედერაციაში ენერგეტიკულ და ფინანსურ სექტორებზე. ამჟამად მიმდინარეობს მუშაობა სანქციების მე-18 პაკეტზე.
პოლიტიკოსი ამბობს, რომ „დადგა მომენტი, როდესაც შეიძლება ისეთი რამ გავაკეთოთ, რასაც სხვა ვითარებაში არ გავაკეთებდით“. მან განმარტა, რომ საუბარია ფინანსურ ბაზრებთან დაკავშირებულ საკითხებზეც.
ენერგეტიკულ სექტორში, ფრეის თქმით, აუცილებელია გათვალისწინებული იქნას სხვა ევროპელთა ინტერესები, რომლებიც აგრძელებენ რუსეთისგან ენერგიის მიღებას და მეტი ყურადღება უნდა მიექცეს სანქციების გვერდის ავლის სქემებს.
