დღეს, 7 მაისს, „ბათუმელებმა“ ბათუმის საქალაქო სასამართლოსთან აჭარის მთავრობის ყოფილი თავმჯდომარის, თორნიკე რიჟვაძის მამის, დავით რიჟვაძის შესახებ ჰკითხა შს სამინისტროს წარმომადგენელს, იურისტს თეა ლაღაძეს.
დავით რიჟვაძე აჭარის პოლიციის დეპარტამენტის დეტექტივების (ოპერატიული) სამმართველოს უფროსი იყო. მას შემდეგ, რაც თორნიკე რიჟვაძემ დატოვა თანამდებობა, გავრცელდა დაუდასტურებელი ინფორმაცია, რომ თანამდებობა დატოვა დავით რიჟვაძემაც და მეტიც, თითქოს ის დააკავეს.
შს სამინისტროს წარმომადგენელმა თეა ლაღაძემ „ბათუმელებთან“ საუბარში დაადასტურა, რომ დავით რიჟვაძე აღარ არის პოლიციის თანამშრომელი. მისი თქმით, რიჟვაძემ თანამდებობა პირადი განცხადების საფუძველზე დატოვა.
რა ეწერა ამ განცხადებაში? – ვკითხეთ თეა ლაღაძეს.
„არ ვიცი, ვერ გეტყვით“ – მოკლედ გვიპასუხა შს სამინისტროს წარმომადგენელმა.
ასევე, მან „ბათუმელებთან“ უარყო ინფორმაცია დავით რიჟვაძის დაკავების შესახებ.
„დავით რიჟვაძე არ არის დაკავებული“ – გვითხრა თეა ლაღაძემ და არც ის დაადასტურა, რომ დავით რიჟვაძის წინააღმდეგ რაიმე ტიპის საგამოძიებო მოქმედებებია დაწყებული.
აჭარის მთავრობის ყოფილი თავმჯდომარე თორნიკე რიჟვაძე 2025 წლის 4 აპრილს, ფეისბუქპოსტით გადადგა.
„მეშვიდე წელია ვიკავებ აღნიშნულ პოზიციას. დროა სიახლის და მინდა წარმატება ვუსურვო მომავალ თავმჯდომარეს. მინდა მადლობა გადავუხადო ,,ქართული ოცნების“ დამფუძნებელს, ბატონ ბიძინა ივანიშვილს“ – დაწერა თორნიკე რიჟვაძემ ფეისბუქზე.
მისი გადადგომიდან რამდენიმე დღეში არაოფიციალურად გავრცელდა ინფორმაცია, თორნიკეს მამის, დავით რიჟვაძის სავარაუდო დაკავებაზე.
ვიდეო:
