ბათუმის პროევროპული აქციების მედროშე, თემურ ქათამაძე ციხიდან [მიგრაციის ცენტრიდან] მორიგ წერილს ავრცელებს და „ივანიშვილის რუსულ რეჟიმს“ მოუწოდებს „თავი დაანებოს ჩინური ენის საქართველოს საგანმანათლებლო სისტემაში შემოტანას“ და ქართული დიასპორის ბავშვებისთვის ქართული ენის სწავლების მიზნით გადადგას ნაბიჯი.
„ივანიშვილის რუსული ოცნების რეჟიმმა თავი დაანებოს ჩინური ენის საქართველოს საგანმანათლებლო სისტემაში შემოტანას! და თუკი ეროვნული რამე განცდა დარჩენილი აქვთ და ნამდვილი ქართული საქმის გაკეთება სურთ, მაშ თურქეთში, ირანში და აზერბაიჯანში მცხოვრები ისტორიული ქართული დიასპორის წარმომადგენლობის ბავშვებისთვის ქართული მშობლიური ენის სწავლის პროექტების განხორციელების ნაბიჯი გადადგას დაუყოვნებლივ!
წინააღმდეგ შემთხვევაში, 80 წლის შემდეგ აღნიშნულ ქვეყნებში ქართული ენის მოლაპარაკე ისტორიული ქართული დიასპორის ვინმე წარმომადგენელი აღარ უნდა დარჩეს!“ – წერს 18 აპრილის წერილში თემურ ქათამაძე:
თემურ ქათამაძის წერილი მიგრაციის ცენტრიდან
თემურ ქათამაძე [გაფფარ ილმაზი] 2025 წლის 11 იანვრის აქციაზე ადმინისტრაციული წესით დააკავეს, შემდეგ კი შსს-მ მისი საქართველოდან გაძევება მოითხოვა.
თემურ ქათამაძეს არ აქვს საქართველოს მოქალაქეობა და ბინადრობა, იგი თურქეთის მოქალაქეა. მის ინტერესებს სასამართლოში ახალგაზრდა იურისტთა ასოციაცია იცავს.
დაკავების დროს, როგორც თემურ ქათამაძე ამბობს, მასზე ფიზიკურად იძალადა ბათუმის პოლიციის უფროსმა ირაკლი დგებუაძემ.
ბათუმის პროევროპული აქციების მედროშე, თემურ ქათამაძე სასამართლოსგან ითხოვს რამდენიმე საათით გათავისუფლებას რელიგიური ქორწინებისთვის. მისი თქმით, მიგრაციის დეპარტამენტმა ამ რიტუალის ცენტრში ჩატარების შესაძლებლობა არ მისცა.
ვრცლად: თემურ ქათამაძე სასამართლოს რამდენიმე საათით გათავისუფლებას სთხოვს ქორწინებისთვის
რაც შეეხება ჩინური ენის სწავლებას – „ქართული ოცნების“ განათლების მინისტრის, ალექსანდრე წულაძის განცხადებით, საჯარო სკოლებში ჩინური ენის სწავლებას აპირებენ. მან ამის შესახებ 16 აპრილს, განათლების სფეროს წარმომადგენლებთან შეხვედრისას ისაუბრა.
ამ თემაზე:
