„ქართული ოცნების“ განათლების მინისტრის, ალექსანდრე წულაძის განცხადებით, საჯარო სკოლებში ჩინური ენის სწავლებას აპირებენ.
მან ამის შესახებ 16 აპრილს, განათლების სფეროს წარმომადგენლებთან შეხვედრისას ისაუბრა.
სამინისტროს ინფორმაციით, დამტკიცდება ჩინურის, როგორც მეორე ენის სტანდარტი და დაიწყება ჩინური ენის შემსწავლელი საგანმანათლებლო რესურსების განვითარება.
„ჩვენი მიზანია შევქმნათ და დავამატოთ ჩინური ენის სტანდარტი იმ სკოლებში, სადაც მოთხოვნა იქნება ჩინური ენის სწავლებაზე. ჩვენ უზრუნველვყოფთ მიწოდებას, ასე რომ ვთქვათ“ – თქვა ალექსანდრე წულაძემ.
მან ასევე განაცხადა, რომ საჯარო სკოლებში მათემატიკისა და საბუნებისმეტყველო მეცნიერებების განვითარების მიმართულებით ახალი ხედვის ლაბორატორიებით აღჭურვა იგეგმება.
ამავე შეხვედრაზე წულაძემ ახსენა მასწავლებლის პროფესიული განვითარებისა და კარიერული წინსვლის ახალი სქემა, სადაც ასევე დაგეგმილია ცვლილებები. სქემაზე საუბრობდა ყველა ახალი მინისტრი, რომელიც ამ თანამდებობაზე ინიშნებოდა.
ბოლო ცვლილება 2024 წელს, გიორგი ამილახვარის დროს განხორციელდა, რის შემდეგაც გაუქმდა მასწავლებლის სტატუსის დანამატი და შესაბამისად, ამ ცვლილებამ გავლენა იქონია პედაგოგების ხელფასებზე. კერძოდ, მაღალი სტატუსების მქონე პედაგოგებს სამინისტრომ გაუუქმა სტატუსის დანამატი, რამაც გამოიწვია ხელფასების არა მატება, არამედ მნიშვნელოვანი კლება, რასაც პედაგოგების უკმაყოფილება მოჰყვა.
______________
ფოტოზე: „ოცნების“ განათლების მინისტრი ალ. წულაძე
