9 აპრილს ბათუმში „თავისუფლების მოედნის“ წარმომადგენლები აჭარაში, მოქალაქეებთან ერთად აპირებენ, რომ ადრიანი დილიდან შეიკრიბონ 9 აპრილის მემორიალთან ბათუმში და ასე სოლიდარობა გამოუცხადონ პოლიტპატიმრების ოჯახებს.
„მთელი დღის განმავლობაში ვიქნებით მემორიალთან და არ ვაპირებთ, ფარისევლებს და რუსული მთავრობის წარმომადგენლებს დავუთმოთ ეს ისტორიული დღე.
გთავაზობთ ყველა მსურველს, დილის 8:00 საათიდან შემოგვიერთდეთ მემორიალთან და დავიცვათ ჩვენი ქვეყნის ღირსება.
ჩვენ შევძლებთ დავიბრუნოთ ქვეყანა“ – წერია სოციალურ ქსელში გავრცელებულ განცხადებაში.
დღეს, 8 აპრილს, ღამით, თბილისში, რუსთაველის გამზირზე, სადაც 9 აპრილის მემორიალი დგას, სინდისის პატიმრების მშობლები და ოჯახის წევრები დარჩებიან ღამის გასათევად.
ტრადიციულად, 9 აპრილს მემორიალთან ხელისუფლების წარმომადგენლები მიდიან ხოლმე, რათა ამ დღეს დაღუპულთა ხსოვნას პატივი მიაგონ.
„რუსული რეჟიმის ვერცერთი წარმომადგენელი, თავისი ფარისევლური ცერემონიებით მემორიალს ვერ მოუახლოვდება” – ამბობენ პატიმრების მშობლებისა და ოჯახის წევრები განცხადებაში.
რეჟიმის ერთ-ერთი ტყვე საბა სხვიტარიძე ციხიდან მოწერილ წერილში ხალხს მიმართავს: „სინდისის პატიმრების სახელით მინდა მივმართო ხალხს: გთხოვთ, გვერდით დაუდგეთ და დაიცვათ ჩვენი მშობლები. ძნელია საკნიდან უყურო ბრძოლის წინა ხაზზე მდგომ მშობელს და ვერ შეძლო მის გვერდით ყოფნა. ამიტომ, 8 აპრილს ძალიან ბევრი უნდა იყოთ რუსთაველზე!”.
