„ანწუხელიძე უკვდავია“ – ამ პლაკატით იდგა დღეს, 28 მარტს, თბილისში, პარლამენტის გვერდით, ტროტუარზე, აქტივისტი თამარ კურატიშვილი, როცა ის პოლიციელებმა დააკავეს.
დაკავების მომენტი ნათლად ჩანს „ნეტგაზეთის“ პირდაპირ ჩართვაში.
ვიდეო კადრებში ასევე ჩანს კიდევ ერთი ქალის, ლილუ შაველაშვილის დაკავებაც.
პირველადი ინფორმაციით, ორივე მათგანი პოლიციის დაუმორჩილებლობის მუხლით არიან დაკავებული. „ბათუმელები“ ინფორმაციას აზუსტებს.
დღეს 28 მარტს, „ქართული ოცნების“ არალეგიტიმური პარლამენტის მიერ შექმნილი კომისია აგვისტოს ომის გენერლებს კითხავს. დღეს თეა წულუკიანი გენერალ მამუკა ყურაშვილს უსვამდა კითხვას „ცხინვალზე ცეცხლის გახსნა რას ემსახურებოდა?“ და ასე შემდეგ.
აგვისტოს ომთან დაკავშირებით ჰააგის სასამართლოს უკვე აქვს გადაწყვეტილება მიღებული, სადაც ომის დამნაშავედ რუსეთია აღიარებული. ამის მიუხედავად, „ქართული ოცნება“ კვლავ ცდილობს ომის თემა წინა წამოსწიოს.
გენერლების დაკითხვამ და საქართველოს სახელმწიფოებრივი ინტერესების საზიანო კითხვების დასვამ წულუკიანის მხრიდან, საზოგადოებაში პროტესტი გამოიწვია.
მოქალაქეები შეიკრიბნენ პარლამენტთან და პროტესტს გამოხატავენ ამ პროცესის მიმართ. „მილიცია“, „რუსებო“ – ისმის შეძახილები აქციაზე.
„ანწუხელიძის, ეროვნული გმირის ხსენება ასე რატომ გაღიაზიანებთ, თქვენც ხომ შვილები გყავთ“- ეუბნებოდა ერთ-ერთი მოქალაქე პოლიციელებს.
პოლიციას გადაკეტილი აქვს ქუჩა და ხალხს პარლამენტის შენობასთან მიახლოების საშუალებას არ აძლევს.
