შინაგან საქმეთა სამინისტრო „ადმინისტრაციულ სამართალდარღვევათა საქმეებზე მტკიცებულებების წარდგენის მიზნით“ 300 ცალი ფლეშ მეხსიერების ბარათის შესყიდვას 3 210 ლარად, გადაუდებელი აუცილებლობით, ტენდერის გარეშე გეგმავს.
სამინისტროს ცალკე ტენდერიც აქვს გამოცხადებული ფლეშ მეხსიერების ბარათების, DVD-R, CD-R დისკების და მეხსიერების ბართების შესყიდვის მიზნით. ამ ტენდერის ფარგლებში სხვადასხვა სახის ჯამში 16 670 ცალ დისკს და მეხსიერების ბარათს სამინისტროს კომპანია „სითიტექი“ 27 230 ლარად სთავაზობს.
სატენდერო დოკუმენტების მიხედვით, შეთავაზებული პროდუქცია ჩინური და ტაივანური წარმოებისაა:
წყარო: შესყიდვების პორტალი
ტენდერი შსს-ს 38 020 ლარით აქვს გამოცხადებული და ის შერჩევა/შეფასების ეტაპზეა. [სამინისტრომ ეს ტენდერი 2025 წლის 24 თებერვალს გამოაცხადა და წინადადებების მიღება 7 მარტს დასრულდა].
შსს-ს განაცხადის მიხედვით, „სატენდერო პროცედურების დასრულებას დასჭირდება გარკვეული ვადა [სავარაუდოდ 25-30 დღე]. შესაბამისად, იმ გარემოებიდან გამომდინარე, რომ შინაგან საქმეთა სამინისტროს დანაყოფებს, ხელი არ შეეშალოთ დიდი მოცულობის მტკიცებულებების წარდგენის პროცესში [რაც უარყოფითად აისახება როგორც სამინისტროს იმიჯზე, ასევე შსს სტრუქტურული დანაყოფების გამართულ ფუნქციონირებაზე]“, ამ ეტაპზე საჭიროა 300 ცალი ფლეშ მეხსიერების შესყიდვა.
ამავე განაცხადში შესყიდვების სააგენტოს შს სამინისტრო წერს, რომ წინასწარ ვერ იქნებოდა განსაზღვრული, რომ „ადმინისტრაციულ სამართალდარღვევათა საქმეებზე, იქნებოდა დიდი მოცულობის მტკიცებულებები“.
ტენდერის დასრულებამდე საჭირო რაოდენობის ფლეშმეხსიერების გადაუდებელი აუცილებლობით შესყიდვის გარეშე შინაგან საქმეთა სამინისტროს დანაყოფები „ვერ უზრუნველყოფენ დიდი მოცულობის მტკიცებულებების წარდგენას, რაც უარყოფითად აისახება როგორც სამინისტროს იმიჯზე, ასევე შსს სტრუქტურული დანაყოფების გამართულ ფუნქციონირებაზე,“ – წერს შსს.
როგორ ზრუნავს შსს უწყების „იმიჯზე“ და რაში იყენებს დისკებს, ეს იმ ადმინისტრაციული საქმეებითაც ჩანს, რომლებსაც სამინისტრო საგულდაგულოდ აყალბებს.
მაგალითად, შსს-ს მიერ გაყალბებული ოქმის საფუძველზე, პოლიციელზე თავდასხმის ბრალდებით, სასამართლომ უკანონო პატიმრობა მიუსაჯა მზია ამაღლობელს.
მზია ამაღლობელი 11 იანვრის აქციაზე თავდაპირველად ადმინისტრაციული წესით დააკავეს შსს-ს აჭარის პოლიციის დეპარტამენტის შენობის ღობეზე სტიკერის გაკვრისთვის: „იფიცება საქართველო“, თუმცა დაკავების ოქმი გაყალბებულია: დაკავების ოქმში ჩაწერეს, რომ მზია ამაღლობელი თითქოს არა სტიკერის გაკვრისთვის, არამედ პოლიციელების სიტყვიერი შეურაცხყოფის გამო დააკავეს.
ამის მტკიცებულებად კი, შსს-მ სასამართლოში დისკით წარადგინა ვიდეო, რომელიც გადაღებულია მზია ამაღლობელის ადმინისტრაციული დაკავების შემდეგ. ანუ შს სამინისტრომ წარმოადგინა ვიდეო, რომელსაც არანაირი კავშირი არ აქვს მზია ამაღლობელის ადმინისტრაციული წესით დაკავებასთან.
„ვიდეოჩანაწერში ვერ დავინახე მზიას მხრიდან პოლიციელებზე სიტყვიერი შეურაცხყოფის მიყენების ფაქტი,“ – ეს თავად მოსამართლე სალიხ შაინიძემ განაცხადა სასამართლო პროცესზე.
ამ თემაზე ვრცლად: მოსამართლემ მზია ამაღლობელის საქმეში არსებული სიყალბე ნაწილობრივ დაადასტურა – ვიდეო
—–
მზია ამაღლობელი ბათუმში აქციაზე იმ დროს დააკავეს, როცა ის იქ სხვა პირების დაკავების შემდეგ მივიდა. პროევროპული საპროტესტო აქციები თბილისში, ბათუმსა და სხვა ქალაქებში 109 დღეა ყოველდღიურად, უწყვეტად იმართება.
მოქალაქეების პროტესტის ფონზე „ქართულმა ოცნებამ“ ადმინისტრაციულ სამართალდარღვევათა კოდექსში ცვლილებები შეიტანა, რითაც იურისტების შეფასებით, შეკრებისა და გამოხატვის თავისუფლება შეზღუდა.
პროევროპული აქციების მონაწილეებს ხშირად აჯარიმებენ გზის გადაკეტვის ბრალდებით. ჯარიმის ოდენობა ამ ეტაპზე 5000 ლარია. მთავარი მტკიცებულება ამ შემთხვევაში მომიტინგეების წინააღმდეგ სახის ამომცნობი კამერების მიერ გადაღებული კადრებია.
ვრცლად: შსს სახის ამომცნობ კამერებს მოქალაქეთა დასაშინებლად და სამომავლო კონტროლისთვის იყენებს – საია
ამ თემაზე:
გზამკვლევი იურისტისგან: რა უნდა ვქნა, თუ პოლიციამ 5000-ლარით დამაჯარიმა გზის გადაკეტვის მუხლით
- რა ხდება
ახალი არჩევნების მოთხოვნით მასშტაბური პროტესტი 109-ე დღეა უწყვეტად მიმდინარეობს თბილისში და საქართველოს სხვა ქალაქებში.
2024 წლის 26 ოქტომბრის არჩევნების შედეგები ევროკავშირის წევრმა მხოლოდ ერთმა სახელმწიფომ, უნგრეთმა აღიარა. პარლამენტი კი საქართველოს კონსტიტუციის დარღვევით შეიკრიბა.
პროტესტი გამწვავდა 2024 წლის 28 ნოემბერს, მას შემდეგ, რაც „ოცნების“ პრემიერმა ირაკლი კობახიძემ განაცხადა, რომ „ქართული ოცნება“ ევროკავშირში გაწევრიანების პროცესს 2028 წლის ბოლომდე აჩერებს.
28 ნოემბრიდან დღემდე ათასობით ადამიანი გამოდის საპროტესტო აქციებზე თბილისში, ბათუმსა და საქართველოს სხვა ქალაქებში. მთავარი მოთხოვნა პოლიტპატიმრების დაუყოვნებლივ გათავისუფლება და ახალი არჩევნების დანიშვნაა.
პოლიციამ და სპეცრაზმმა რამდენჯერმე სასტიკი ძალადობით დაარბია აქცია. მთლიანობაში ქვეყნის მასშტაბით დააკავეს 500-ზე მეტი ადამიანი, აქედან სისხლის სამართლის კოდექსით 50-ზე მეტი მოქალაქე. მათ შორის უკანონოდაა დაკავებული ბათუმელები/ნეტგაზეთის დამფუძნებელი და დირექტორი მზია ამაღლობელი, რომელიც პროტესტის ნიშნად 38 დღე შიმშილობდა.
მზია ამაღლობელის სასამართლო პროცესი სისხლის სამართლის საქმეზე 18 მარტს არის ჩანიშნული .
სასამართლომ მზია ამაღლობელს თავის დაცვის უფლება ჩამოართვა – ადვოკატების განცხადება
