13 მარტს ბათუმის საქალაქო სასამართლოში მოსამართლე სალიხ შაინიძემ მზია ამაღლობელის ადმინისტრაციული საქმე განიხილა.
საქმე ეხება 11 იანვრის ღამეს „ბათუმელებისა“ და „ნეტგაზეთის“ დამფუძნებლის, ჟურნალისტისა და მედიამენეჯერის, მზია ამაღლობელის დაკავებას სტიკერის გაკვრისთვის.
მზია ამაღლობელი სტიკერის პოლიციის დამხმარე შენობაზე გაკვრისთვის 11 იანვარს დააკავა აჭარის პოლიციის უფროსმა გრიგოლ ბესელიამ და ამის ამსახველი ვიდეოკადრები საქმეშია წარმოდგენილი. ამავე ვიდეოკადრებში ისმის ბათუმის პოლიციის უფროსის, ირაკლი დგებუაძის განმარტება, რომ მზია ამაღლობელი დაკავებულია 150-ე მუხლით, თუმცა შსს-მ მზია ამაღლობელის დაკავების ოქმი გააყალბა და გაყალბებულ ოქმში ჩაწერა, რომ მზია ამაღლობელი დააკავეს ადმინისტრაციული კოდექსის 173-ე მუხლით, პოლიციელების სიტყვიერი შეურაცხყოფისთვის და იგი დააკავა არა ბესელიამ, არამედ ბათუმის პოლიციის უფროსის მოადგილემ, გოჩა ვანაძემ.
დაცვის მხარე ამ საქმეში გრიგოლ ბესელიასა და ირაკლი დგებუაძის დაკითხვას ითხოვდა. მოსამართლე სალიხ შაინიძემ ეს შუამდგომლობა არ დააკმაყოფილა, თუმცა განაცხადა, რომ სასამართლოს დადასტურებულად მიაჩნია ის ფაქტობრივი გარემოებები, რაც მზია ამაღლობელი დაკავების ამსახველ ვიდეოში ჩანსs, ასევე ის ვიდეო, სადაც ისმის ბათუმის პოლიციის უფროსის ირაკლი დგებუაძის ხმა, რომ მზია ამაღლობელი დაკავებულია ასკ-ის 150-ე მუხლით.
„ჩვენ დღევანდელ სხდომაზე გამოვიკვლიეთ ვიდეომტკიცებულებები და მე ვაფიქსირებ სასამართლო სხდომის ოქმში, რომ ვიდეომტკიცებულებების გამოქვეყნების შედეგად სასამართლოს დადასტურებულად მიაჩნია – პირველი შემთხვევა არის სტიკერის მიკვრის, ბესელიამ თუ დგებუაძემ, ბესელიამ მგონი ხელი მოკიდა და არ გაუწევია წინააღმდეგობა მზიას, შეჰყვა მას პოლიციას ეზოში. შენობაში მეორე ჩანაწერია ასევე, სადაც ირაკლი დგებუაძე ამბობს – „150-ე მუხლით დავაკავეთ“, ეს ორი ფაქტი სასამართლოს დადასტურებულად მიაჩნია.
აქედან გამომდინარე სასამართლო უარს გეუბნებათ მათ დაკითხვაზე.
სასამართლოს დადასტურებულად მიაჩნია ვიდეოჩანაწერი. ისინი ამას დაადასტურებენ, თუ უარყოფენ ეს სხვა საკითხია. მე დადასტურებულად მიმაჩნია“ – განაცხადა სასამართლო პროცესზე მოსამართლე სალიხ შაინიძემ.
მზია ამაღლობელი სასამართლო სხდომას პენიტენციური დაწესებულებიდან, დისტანციურად ერთვებოდა. მან განაცხადა, რომ მისი ადმინისტრაციული დაკავების საქმე გაყალბებულია.
მოსამართლე სალიხ შაინიძე ამ საქმეზე გადაწყვეტილებას 18 მარტს გამოაცხადებს.
სწორედ 18 მარტს არის ჩანიშნული მზია ამაღლობელის სასამართლო პროცესი სისხლის სამართლის საქმეზე.
ამავე თემაზე:
სასამართლომ მზია ამაღლობელს თავის დაცვის უფლება ჩამოართვა – ადვოკატების განცხადება
