ბათუმის საქალაქო სასამართლომ პროევროპულ საპროტესტო აქციაზე დაკავებულ გიორგი სიხარულიძეს 12 დღიანი ადმინისტრაციული პატიმრობა შეუფარდა.
მას ბრალად პოლიციელის შეურაცხყოფა ედება.
გიორგი სიხარულიძე 15 თებერვალს, საპროტესტო აქციაზე პერფორმანსის გამართვის გამო დააკავეს. მან რეზინის ტყვია ისროლა პოლიციის მიმართულებით, რომელიც ერთ-ერთ პოლიციელს მოხვდა.
გიორგი სიხარულიძის ინტერესებს სასამართლოში ადვოკატი პაატა დიასამიძე იცავს. პაატა დიასამიძის თქმით, მისი დაცვის ქვეშ მყოფი პირის მიერ გამართული პერფორმანსი სრულად ჯდებოდა გამოხატვის თავისუფლებაში.
„გიორგი სიხარულიძემ პროცესზე თქვა, პერფორმანსი გავაკეთე, პოლიციელებისთვის რაიმე სახის შეურაცხყოფა არ მინდოდაო. თავად პოლიციელებიც ადასტურებდნენ – არ მოუყენებია შეურაცხყოფა ჩვენთვისო.
ვთვლი, რომ გიორგი სიხარულიძის მიერ გამართული პერფორმანსი სრულად ჯდებოდა გამოხატვის თავისუფლების ფარგლებში. თუმცა ის სასამართლომ ადმინისტრაციული პატიმრობით დასაჯა,“ – ამბობს პაატა დიასამიძე.
ადვოკატი გიორგი სიხარულიძის მიმართ ბათუმის საქალაქო სასამართლოს მიერ გამოტანილ განაჩენს ქუთაისის სააპელაციო სასამართლოში გაასაჩივრებს.
პაატა დიასამიძე
