ბათუმში, საკონსტიტუციო სასამართლოსთან, საპროტესტო აქცია კარვებში ღამისთევით აღარ გაგრძელდება – ამის შესახებ დღეს, 4 თებერვალს, გვიან ღამით განაცხადეს აქციაზე, მას შემდეგ, რაც ცნობილი გახდა, რომ მზია ამაღლობელი კლინიკაში გადაიყვანეს შიმშილობის 24-ე დღეს.
„რამდენიმე საათის წინ ცნობილი გახდა, რომ მზია ამაღლობელს დასჭირდა ჰოსპიტალიზაცია. კლინიკა „ვივამედის“ დირექტორმა გააკეთა ვრცელი განცხადება, რომ მისი მდგომარეობა სტაბილურია, მაგრამ არის გარკვეული ცვლილებები, რაც საჭიროებს მედიკამენტურ და სხვა ტიპის ჩართულობას. ის არის საიმედო ექიმების ხელში, მუდმივი მეთვალყურეობის ქვეშ იქნება სულ მცირე მომდევნო რამდენიმე დღე. ამავე დროს, მზია ამაღლობელი აგრძელებს შიმშილობას.
ჩვენ ერთი კვირის წინ განვაცხადეთ, რომ კარვები საკონსტიტუციო სასამართლოსთან და აჭარის მთავრობის წინ დაიდგმებოდა მანამდე და სამოქალაქო აქტივისტები, საჯარო პირები, პოლიტიკოსები – მათ შორის, გაათენებდნენ ღამეს მზია ამაღლობლის ჰოსპიტალიზაციის, მისი მდგომარეობის გაუმჯობესების მოთხოვნით, სანამ არ მოხდებოდა შიმშილობით გამოწვეული საფრთხეების მინიმუმამდე დაყვანა.
ამიტომ ბათუმის წინააღმდეგობის მოძრაობა, რომელმაც აქ ექვსი ღამე გაათია, წყვეტს ამ ფორმით პროტესტს, პირდაპირი ეთერის შემდეგ დავიწყებთ კარვების დემონტაჟს. ეს კარვები ამ დღეებში ყველაზე მკაფიოდ განასახიერებდა ჩვენს პროტესტს, მუხტს, რომელიც აქ მყოფ თითოეულ მოქალაქეს ჰქონდა და დიდი მადლობა მინდა გადავუხადო ყველას, ვინც აქ იყო“ – განაცხადა მალხაზ ჭკადუამ აქციაზე.
ამავე დროს, ბათუმში საკონსტიტუციო სასამართლოსთან ყოველდღიური აქციები, რომელიც უკვე 69 დღეა უწყვეტად მიმდინარეობს, გაგრძელდება.
ასევე, წინააღმდეგობის მოძრაობა გაიშლება აჭარის მუნიციპალიტეტებში, სადაც საპროტესტო აქციების მონაწილეები გასვლას და მოსახლეობასთან შეხვედრებს გეგმავენ.
პირველი ადგილი, სადაც წინააღმდეგობის მოძრაობის წევრები აპირებენ ჩასვლას, შუახევია, ჭვანის ხეობა, საიდანაც არის მზია ამაღლობელი. გარდა ამისა, იგეგმება გასვლა და მოსახლეობასთან შეხვედრები აჭარის ყველა მუნიციპალიტეტში.
ბათუმში, საკონსტიტუციო სასამართლოსთან კარვები 29 იანვარს გაშალეს. ტროტუარზე ჯერ მოზრდილი კარავი განათავსეს, თუმცა ეს კარავი პოლიციამ ძალის გამოყენებით დაშალა და ფაქტობრივად, გაიტაცა.
ამის შემდეგ აქციაზე უფრო მსუბუქი კონსტრუქციის ორი კარავი მიიტანეს და გაშალეს პოლიციის წინააღმდეგობის მიუხედავად. აქ პროტესტი 24-საათიან რეჟიმში გრძელდებოდა.
