საზღვაო აკადემიის ადმინისტრაციამ თანამშრომლებს ელექტრონული ფოსტით საახალწლო მისალოცი გაუგზავნა, რომელზეც რუსული დროშაა გამოსახული. საახალწლო წერილი აკადემიაში დასაქმებულებს ადამიანური რესურსების მართვის დეპარტამენტის სახელით მიუვიდათ.
მისალოცზე დართულ გამოსახულებაზე ასევე ჩანს რუსეთის მეზღვაურთა პროფკავშირის [seafarers union of russia] ლოგოც.
ფაქტს ადასტურებს საზღვაო აკადემიის რექტორი, მურთაზ დევაძე. მან „ბათუმელებს“ უთხრა, რომ შეცდომა მოუვიდა თანამშრომელს, რომელმაც მისალოცი გააგზავნა.
„ერთ-ერთმა მენეჯერმა გააგზავნა შეტყობინება და გუგლიდან ამოიღო მისალოცი, არ დააკვირდა… შემდეგ შეეცადა დაბრუნებას, წაშალა რა, მაგრამ შეეშალა რა, თვითონ მენეჯერს.
მე არ ვარ დღეს სამსახურში. ვინც ნახა ადგილზე, იმ წუთშივე უთხრა, რომ რაღაც შეცდომაა, არ არის კარგი… შეეშალა რა ვუყოთ, შეეშალა, არ უნდა ამოეღო გუგლიდან, ჩვენ გვაქვს გაკეთებული ჩვენი ბანერი და ის უნდა დაადოს, მაგრამ შეეშალა.
რომ ჩავალ, დანარჩენს გავარკვევ, რატომ აიღეს გუგლიდან და რატომ არ გამოიყენეს აკადემიის ოფიციალური. შეცდომა ხდება ყველგან, არ დააკვირდა, ამოიღო გუგლიდან, მოეწონა ფოტოზე გემი და საახალწლო მილოცვა მიამაგრა”, – განმარტა საზღვაო აკადემიის რექტორმა.
ფაქტის ამსახველი „სქრინი“ თავდაპირველად „აჭარა თაიმსმა“ მოიპოვა.
___
ამავე თემაზე:
„ბოდიში“ – ბათუმის მერი თავის მოხსენებაში რუსეთის რუკის გამოყენებაზე
