25 დეკემბერს მერია ბათუმში ნაძვის ხის ანთებას და საბავშვო კონცერტს გეგმავს. მერიის ინფორმაციით, ბათუმის მთავარ ნაძვის ხეს 20:00 საათზე, საბავშვო კონცერტის შემდეგ აანთებენ. საბავშვო კონცერტი დაიწყება 15:00 საათზე და 18:00 საათამდე გაგრძელდება. წარმოდგენას გამართავენ ანიმატორები და ზღაპრის გმირები.
18:00 საათიდან 22:00 საათამდე კი გაიმართება კონცერტი საბავშვო სტუდიების მონაწილეობით.
ისევე როგორც ნაძვის ხე, საკონცერტო სცენაც ევროპის მოედანზეა დამონტაჟებული. მიმდებარედ საკონსტიტუციო სასამართლოსთან უკვე 26 დღეა ანტირუსული საპროტესტო აქციები იმართება, დღეს, 27-ე დღეს, საპროტესტო აქციის მონაწილეების 19:00 საათიდან გეგმავენ შეკრებას.
ამ დრომდე სხვა საახალწლო ღონისძიებების შესახებ მერიას ინფორმაცია არ გაუვრცელებია. არ ვიცით, ვინ იმღერებს 31 დეკემბრის ღამეს.
არ შედგა ორი ტენდერი, რომლებიც ბათუმის კულტურის ცენტრს საახალწლო ღონისძიებების ორგანიზების შესყიდვის მიზნით ჰქონდა გამოცხადებული, ორივე ტენდერში ერთი კომპანია, შპს „მიქს სტუდიო“ მონაწილეობდა, რომელმაც დისკვალიფიკაცია მიიღო. ორივე ტენდერის ბიუჯეტი 400 ათასზე მეტი ლარია.
გარდა ამისა, საშობაო-საახალწლო დღეებში ქალაქის გაფორმებისათვის მანათობელი კონსტრუქციებისა და სხვადასხვა მოწყობილობის მონტაჟის მომსახურება ბათუმის მერიამ 2024 წლის ნოემბერში შეისყიდა. ტენდერი საქალაქო ინფრასტრუქტურისა და კეთილმოწყობის სამსახურმა 1 მილიონ 799 ათას 850 ლარით გამოაცხადა. გამარჯვებულმა კომპანიამ ელექტრონულ ვაჭრობაში იგივე ფასი დააფიქსირა – ერთი ლარიც არ დაუკლია.
გამარჯვებული ისევ „აჭარგანათებაა“ და ისევ უკონკურენტოდ მოიგო ტენდერი.
