მედიაომბუდსმენის განცხადებით, სპეციალური აკრედიტაციის სისტემის შემოღებით „ქართული ოცნება“ აგრძელებს მედიის უფლებების შეზღუდვას საქართველოს პარლამენტში.
„14 დეკემბერს „ქართული ოცნების“ მიერ დადგენილი საპრეზიდენტო არჩევნების გაშუქებისთვის სპეციალური აკრედიტაციის სისტემის შემოღებით „ქართული ოცნება“ აგრძელებს მედიის უფლებების შეზღუდვას საქართველოს პარლამენტის სასახლეში.
იმ დროს, როცა მედიის წარმომადგენლები ფლობენ მოქმედ საშვებს პარლამენტის შენობაში სამუშაოდ, მათთვის სპეციალური საშვების შემოღება არის ადმინისტრაციული ბარიერი და ქმნის პოტენციურ შესაძლებლობებს დისკრიმინაციისთვის.
კრიტიკული მედიის ნებისმიერმა შეზღუდვამ შესაძლოა წაართვას ჟურნალისტებს და მედია ორგანიზაციებს შანსი სრულყოფილი და მკაფიო ინფორმაცია მიაწოდონ საზოგადოებას. ეს, თავის მხრივ, დააზიანებს მოსახლეობის მთავარ უფლებას – თავისუფლად მიიღოს ინფორმაცია და გააკეთოს ინფორმირებული არჩევანი.
ამდენად, უმნიშვნელოვანესია, ყველა მედია ორგანიზაციას ჰქონდეს თანასწორი შესაძლებლობა დაესწროს პოლიტიკურ პროცესს და მათთვის მუშაობის შესაძლებლობა არ იყოს შეზღუდული ადმინისტრაციული ბარიერებით.
მივმართავთ „ქართული ოცნების“ ლიდერს, შალვა პაპუაშვილს:
გაითვალისწინოს დისკრიმინაციის რისკები: სპეციალური აკრედიტაციის სისტემის ამოქმედებით იქმნება კრიტიკული მედიის წარმომადგენლების შეზღუდვის რისკები;
შესაძლებლობა ყველა მედიისათვის: სპეციალური საშვების სისტემა არ უნდა ქმნიდეს წინაპირობას იმისათვის, რომ ზოგიერთი მედია არ იყოს დაშვებული დაგეგმილი არჩევნების გაშუქებაზე;
სწრაფი პროცედურები: ყველა მედიას მიეცეს შესაძლებლობა სწრაფ რეჟიმში მიიღოს შესაბამისი საშვები“, – ამბობს მედიაომბუდსმენი.
აკრედიტაციის წესი, რომელიც არღვევს მედიის უფლებებს, „მედიაომბუდსმენმა“ საკონსტიტუციო სასამართლოშიც გაასაჩივრა. თუმცა ამ დრომდე საკონსტიტუციო სასამართლოს აღნიშნული წესების საფუძველზე აკრედიტაციის შეჩერებით უფლებადარღვეული ჟურნალისტების და ოპერატორების მოთხოვნები არ განუხილავს.
