ხელოვნების უნივერსიტეტის სტუდენტები დაკავებული 4 სტუდენტისა და ხელოვნების ფაკულტეტის დეკანის გათავისუფლებას ითხოვენ.
სტუდენტებმა დღეს, 10 დეკემბერს, უნივერსიტეტში დაკავებულების მხარდასაჭერი აქცია მოაწყვეს.
გუშინ, 9 დეკემბერს, დააკავეს ბათუმის ხელოვნების უნივერსიტეტის სახვითი, სასცენო და კინო-ტელეხელოვნების ფაკულტეტის დეკანი, პროფესორი მამუკა ჯორბენაძე და ამავე უნივერსიტეტის 4 სტუდენტი – დავით გვიანიძე, ანრი კაკაბაძე, გიორგი დავითაძე და გურამ მიქელაძე.
მათ პროკურატურა ჯგუფური ძალადობის ჩადენას ედავება.
ხელოვნების უნივერსიტეტის სტუდენტები, რომლებმაც დაკავებულ დეკანსა და თანაკურსელებს მხარდაჭერა გამოუცხადეს, მედიასთან ღიად ჰყვებიან კონფლიქტის განვითარების დეტალებს.
კერძოდ, მათი თქმით, კონფლიქტი დაიწყო 3 დეკემბრის დილას, როდესაც სტუდენტთა ერთი ჯგუფი ქვეყანაში მიმდინარე ანტირუსული აქციების სოლიდარობის მიზნით გაიფიცა და უნივერსიტეტში საინფორმაციო დაფებზე საპროტესტო ფურცლები გააკრა. სტუდენტებს ეს ფურცლები ჩამოუხიეს, ხოლო მას შემდეგ, რაც თავიდან სცადეს გაკვრა, ამაში ხელის შეშლა ხელოვნების უნივერსიტეტის ლექტორმა თეა ცაგურიამ სცადა.
„ვაკრავდით პლაკატებს, რა დროსაც გამოვიდა თეა ცაგურია და ჩამოგვიხია ეს პლაკატები. გვითხრა, რომ წავსულიყავით სახლში. გვაბრალებდა, რომ ვაბულინგებდით და ვძალადობდით იმ ბავშვებზე, ვინც არ ერთვებოდა პროტესტში. რა თქმა უნდა, ეს არის სიცრუე, რადგან თავიდანვე გავაკეთეთ განცხადება, რომ ჩვენ არავის არ ვთხოვდით ჩვენ გვერდით დადგომას. მე თავად ვთქვი, – ახლა გვჭირდება ერთობა, მაგრამ არავის არაფერს არ ვაძალებთ.
ცაგურიამ პირადად მე მომმართა – რატომ არ აცლი სხვებს განათლების მიღებასო. ამაზე შევეკითხე: სად განათლებას, რუსეთში განათლებას-მეთქი? და ამ დროს ქალბატონმა თეამ ძალიან დამცინავი და ხმამაღალი ტონით მომმართა, რომ მე ვდემაგოგობ.
სწორედ ამის შემდეგ, რაც გაიგო როგორ მელაპარაკებოდა ლექტორი, მოვიდა ბატონი მამუკა ჯორბენაძე და დაიჭირა ჩვენი, სტუდენტების მხარე.
სტუდენტებს ესაუბრე წესიერი ტონით და ნუ ესაუბრები ეგრეო, – არაერთხელ მიმართა თეა ცაგურიას. ცაგურია სტუდენტებს გვეუბნებოდა, რომ ჩვენ ვართ ნაცები და ნაცების გვერდით ვდგავართ. ხაზგასმით ვამბობ – არც ერთ პარტიას არ მივეკუთვნებით აქ მდგომი არც ერთი სტუდენტი. ამ დროს ლექტორი ტელეფონში გვაჩვენებდა ციხის კადრებს და გვეუბნებოდა ამათ უჭერთ მხარსო,“ – ჰყვება ხელოვნების უნივერსიტეტის სტუდენტი მარიამ გუჯაბიძე.
როგორც სტუდენტები ჰყვებიან, 3 დეკემბრის საღამოს „საქმის გარკვევა“ დაიწყო თეა ცაგურიას ქმარმა, რომელიც ბათუმის მერიაში თანამდებობის პირია. მან შეურაცხმყოფელი შინაარსის მესიჯი მისწერა მამუკა ჯორბენაძეს.
„ქალებთან ასეთი მაგარი ტრ**ი თუ გაქ, კაცებთან გაგსინჯავ ვინ ხარ ვაფშე. ენას ამოგაძრობ ნაძირალა ფაშისტო. უყვირე და უღრიალე შენს ოჯახის წევრებს. დანარჩენს პირადად გეტყვი,“ – წერს ფეისბუქზე მიწერილ მესიჯში ირაკლი დევაძე მამუკა ჯორბენაძეს.
„მოდი, აქა ვარ, უნივერსიტეტში“, – წერს პასუხად მამუკა ჯორბენაძე.
ირაკლი დევაძისა და მამუკა ჯორბენაძის მიმოწერა კონფლიქტამდე. ფოტო ხელოვნების უნივერსიტეტის სტუდენტებმა გაავრცელეს
თავად ირაკლი დევაძე მედიასთან კომენტარს არ აკეთებს. მან ფეისბუქზე კონფლიქტის ამსახველი ვიდეო გამოაქვეყნა და დაწერა, რომ მამუკა ჯორბენაძემ “პოლიტიკურ ნიადაგზე სიტყვიერი, ფსიქოლოგიური და მორალური შეურაცხყოფა მიაყენა მის მეუღლეს”. თავად კი უნივერსიტეტში “სასაუბროდ” მივიდა.
კადრებში, რომელიც ირაკლი დევაძემ გაავრცელა, ჩანს, როგორ შედის ის ხელოვნების უნივერსიტეტის შენობაში და შემდეგ იწყება ჩხუბი.
„კადრებს, რომელიც გავრცელდა, სამწუხაროდ არ ახლავს ხმა, მასში ჩანს მხოლოდ მოქმედება. როცა თეა ცაგურიას ქმარი უნივერსიტეტში შემოვიდა, აგინებდა ბატონ მამუკას და შეურაცხყოფას აყენებდა,“ – ჰყვება ბათუმის ხელოვნების უნივერსიტეტის სტუდენტი „ბათუმელებთან“.
კონფლიქტი 3 დეკემბერს მოხდა, მაშინ, როცა ბათუმში სტუდენტური პროტესტი ძალას იკრებდა.
სტუდენტები, ისევე როგორც ხელოვნების ფაკულტეტის დეკანი, აქტიურად იყვნენ ჩართულნი პროევროპულ საპროტესტო აქციებში.
მამუკა ჯორბენაძე და 4 სტუდენტი კონფლიქტიდან 6 დღის შემდეგ, 9 დეკემბერს დააკავეს.
