დღეს, 4 დეკემბერს, ბათუმში რამდენიმე საპროტესტო აქცია იმართება.
ბათუმის ქუჩებში დილიდან მსვლელობა მოაწყვეს სკოლის მოსწავლეებმა, რომლებიც ქალაქის პირველ საჯარო სკოლასთან შეუერთდნენ მშობლების მარშს.
მოსწავლეების აქცია ბათუმში / 4.12.2024
მშობლების მარში კი, ბათუმში, დღის 2 საათზე დაიწყო. მოქალაქეები აპროტესტებენ „ქართული ოცნების“ ხელისუფლების გადაწყვეტილებას თქვას უარი ევროკავშირთან მოლაპარაკებების დაწყებაზე. მშობლები პირველი საჯარო სკოლის შენობიდან ილია ჭავჭავაძის ძეგლთან მივიდნენ.
მშობელთა მარში ბათუმში / 4.12.2024
მშობლების მარში ბათუმში / 4.12.2024
პარალელურად ბათუმში ქალების აქცია გაიმართა აჭარის პოლიციის დეპარტამენტის შენობასთან.
„ჩვენ, საქართველოს ქალები და დედები, პოლიციას ვთხოვთ პასუხს ჩვენი შვილების მხეცური დარბევისათვის…“ – აღნიშნული იყო აქციის ორგანიზატორების მიერ გავრცელებულ ინფორმაციაში. ქალების აქცია დღეს ქვეყნის მასშტაბით პოლიციის სხვადასხვა განყოფილებასთან იმართება.
ქალების აქცია აჭარის პოლიციის დეპარტამენტის შენობასთან / 4.12.2024
დღესვე, 16:00 საათზე, სამედიცინო ასოციაციების გაერთიანების ინფორმაციით სამედიცინო დაწესებულებების წინ, საქართველოს ყველა რეგიონში, თეთრხალათიანთა აქციები ჩატარდება გზავნილებით:
„ვემხრობით საქართველოს ევროატლანტიკურ ინტეგრაციას, შეწყდეს დემონსტრანტების ჯანმრთელობის დაზიანება, ვგმობთ კონსტიტუციის 78-ე მუხლის დარღვევას.“
ბათუმში აქციას შეუერთდებიან „საზღვაო ჰოსპიტალის“, „ბათუმის საერთაშორისო ჰოსპიტალის [ბაუ] ექიმები. აქციაზე გასვლას გეგმავენ ასევე „რესპუბლიკური საავადმყოფოს“, „მედ-ცენტრის“ და „მედინას“ თანამშრომლებიც.
——
რა ხდება
საქართველოში მეშვიდე დღეა საპროტესტო აქციები იმართება.
28 ნოემბერს „ქართული ოცნების“ პრემიერ-მინისტრმა ირაკლი კობახიძემ განაცხადა შემდეგი – „მივიღეთ გადაწყვეტილება, 2028 წლის ბოლომდე დღის წესრიგში არ დავაყენოთ ევროკავშირთან მოლაპარაკებების გახსნის საკითხი“. კობახიძის ამ განცხადებას ხალხის ქუჩაში გამოსვლა და უწყვეტი საპროტესტო აქციები მოჰყვა საქართველოს ქალაქებში.
2 დეკემბრიდან გაფიცვა დაიწყეს სკოლებმა და უნივერსიტეტებმა.
საქართველოს მოქალაქეები ითხოვენ დაინიშნოს ხელახალი არჩევნები და გადაგდეს მთავრობა.
