ბათუმში, ქვესადგურ „ბათუმი 2“-ში მომხდარი ხანძრის გამო რამდენიმე საათია რაც ასობით აბონენტს დენი არ მიეწოდება.
დენის მიწოდება შეწყვეტილია ნაწილობრივ ჯავახიშვილის, ლერმონტოვის, ორბელიანისა და მიმდებარე ქუჩებზე. ასევე დენი არ მიეწოდება ე.წ. „ხოფის ბაზრობის“ მიმდებარე ტერიტორიის ნაწილს.
„ენერგო-პრო ჯორჯიას“ ინფორმაციით, მიმდინარეობს აღდგენითი სამუშაოები, თუმცა ზუსტი დრო, როდის აღდგება ელექტროენერგიის მიწოდება, კომპანიაში ვერ გვითხრეს.
„მაქსიმალურად ვცდილობთ მალე აღვადგინოთ. ჩართულია ყველა საჭირო ტექნიკური ჯგუფი. ამასთან, ამ დროისთვის ხანძრის გამომწვევი მიზეზიც უცნობია და მიმდინარეობს მოკვლევა“, – გვითხრეს „ენერგო-პროში“.
ორბელიანის ქუჩაზე [ჯავახიშვილის ქუჩის ბოლოში] მდებარე მაღალი ძაბვის ელექტრო-ქვესადგურში ხანძარი დღეს, 14 ნოემბერს, დაახლოებით დღის 2 საათისთვის გაჩნდა.
განახლება: „ენერგო-პრო ჯორჯიადან“ მოგვიანებით მოგვწერეს, რომ ხანძრის შედეგად „საკმაოდ მნიშვნელოვანი ზიანია. ამ ეტაპზე აბონენტების უმრავლესობას , რომელიც აღნიშნული ქვესადგურიდან მარაგდება ელექტროენერგია სტაბილურად მიეწოდება, მაგრამ დაზიანების სიმძიმიდან გამომდინარე დღეს [14 ნოემბერს] სრულად აღდგენა შეუძლებელია. სავარუდოდ გამორთული დარჩება 450-მდე აბონენტი ჯავახიშვილისა და ორბელიანის ქუჩების გადაკვეთებსა და მიმდებარე ტერიტორიაზე.
ცეცხლის გაჩენისთანავე რეაგირება ოპერატიულად მოხდა. ხანძრის ლიკვიდაცია რამდენიმე წუთში მოხერხდა, თუმცა ტექნიკური ნაწილების დაზიანება მაინც გამოწვია. ხანძრის გამო არავინ დაშავებულა.“
ხანძარი ქვესადგურ „ბათუმი 2“-ში / ფოტო: „ენერგო-პროს“ ვიდეოდან / 14.11.2024
ხანძარი ქვესადგურ „ბათუმი 2“-ში / ფოტო: „ენერგო-პროს“ ვიდეოდან
ხანძარი ქვესადგურ „ბათუმი 2“-ში / ფოტო: „ენერგო-პროს“ ვიდეოდან
