ბათუმის რუსთაველის სახელმწიფო უნივერსიტეტის პროფესორი მალხაზ ნაკაშიძე ამბობს, რომ უნივერსიტეტის ადმინისტრაციამ ისე ამოიღო მისი ორი საგანი სასწავლო კურსიდან, რომ ამის შესახებ არც მას და არც სტუდენტებს არაფერი აცნობა.
პროფესორის თქმით, თვე-ნახევარია პროგრამიდან ამოღებულ საგნებში ლექციებს უკითხავს სტუდენტებს. საგნების გაუქმების შესახებ კი შემთხვევით გაიგო.
„2020 წელს გავიმარჯვე ევროკავშირის ერთ-ერთ ყველაზე პრესტიჟულ კონკურსში და ბსუ-ში ჩამოვაყალიბე ჟან მონეს კათედრა. ამ პროექტის ფარგლებში, სამართლის, საჯარო მმართველობის, საერთაშორისო ურთიერთობების და ევროპისმცოდნეობის პროგრამების სტუდენტებისთვის შეიქმნა სამი ახალი სასწავლო კურსი, მათ შორის „ადამიანის უფლებების დაცვა ევროკავშირში“ და „ევროკავშირის კონსტიტუციური სამართალი”.
მიუხედავად იმისა, რომ თავიდანვე დიდი წინააღმდეგობა შემხვდა ამ კურსის დანერგვისას, არ შეჰქონდათ ბაზაში, რომ სტუდენტებს დაენახათ და აერჩიათ. დეკანთან და რექტორთანაც ძალიან ხმამაღალი საუბარი მქონდა ამაზე და შემდეგ მაინც ჩამისვეს ეს საგნები სასწავლო კურსში, როგორც არჩევითი საგნები და ვკითხულობდი ლექციებს.
ბოლო ერთი წელი აკადემიურ შვებულებაში, კვლევითი სტიპენდიით ვიყავი იტალიაში და ჩემს საგნებს სალომე კარალიძე კითხულობდა. როცა დავბრუნდი, მოვითხოვე ჩემი საგნების დაბრუნება.
წელს, როცა დაიწყო ახალი სასწავლო წელი, ჩამისვეს დატვირთვაში და იყო ცხრილშიც. დავიწყე ლექციების ჩატარება. თვე-ნახევარია ვატარებ ლექციებს საგნებში – „ადამიანის უფლებების დაცვა ევროკავშირში“ და „ევროკავშირის კონსტიტუციაში“ და რომ პროგრამიდან იყო ამოღებული ეს საგნები, არ ვიცოდი. უცნაურია არა?“ – ამბობს მალხაზ ნაკაშიძე.
თუ საგნები გაუქმებული იყო, როგორ აირჩიეს სტუდენტებმა, ცხრილში მაინც იყო შეტანილი? – ვკითხეთ მალხაზ ნაკაშიძეს.
„ლოგიკური კითხვაა. მეც ეს მაინტერესებს.
როცა სექტემბერში დავბრუნდი, ჩემთვის არავის უთქვამს, რომ საგნები გაუქმებული იყო. სტუდენტებმაც ჩვეულებრივად აირჩიეს.
დეკანს შევხვდი, დეპარტამენტის უფროსს, არაერთ ადამიანთან მქონდა საუბარი და არავის არაფერი უთქვამს საგნების გაუქმებაზე. სრულიად შემთხვევით გავიგე დეპარტამენტში საუბრის დროს, როცა მოწვეულ პროფესორს უთხრეს, შენი კურსი ამოვარდა პროგრამიდანო და მაშინ გავიგე, რომ ჩემი ორი საგანიც იყო ამოღებული.
როცა კითხვები დავუსვი დეპარტამენტის უფროსს, მითხრა – „მე არაფერი ვიცი“.
ბოლოს, აკადემიური საბჭოდან გამოვითხოვე დოკუმენტი და იქ ეწერა, რომ 2023 წელს საჯარო მმართველობის პროგრამაში შეუტანიათ ცვლილებები და სასწავლო გეგმიდან ჩემი ორივე საგანი ამოუღიათ ისე, რომ არც ჩემთვის მოუწერიათ რაიმე, არც რაიმე განხილვა ყოფილა და დღემდე არაფერი ვიცოდი ამის შესახებ“, – ამბობს ნაკაშიძე.
ბსუ-მ მალხაზ ნაკაშიძის საპასუხოდ უნივერსიტეტის ფეისბუქზე გამოაქვეყნა პოსტი, სადაც წერს, რომ „საჯარო მმართველობის“ საბაკალავრო პროგრამის აკრედიტაციის ვადა 2024 წლის 31 დეკემბერს იწურება.
„აქედან გამომდინარე, ამ და ბსუ-ს სხვა საგანმანათლებლო პროგრამების რეაკრედიტაციის მიზნით, ბსუ-ს აკადემიური საბჭოს მიერ დამტკიცებული ,,საჯარო მმართველობის“ განახლებული, დარგობრივ მახასიათებელთან შესაბამისობაში მოსული 3-წლიანი საგანმანათლებლო პროგრამა წარადგინა „განათლების ხარისხის ეროვნულ ცენტრში“.
ბსუ-ს განმარტებით, ევროკავშირის კონსტიტუციური სამართალი და ადამიანის უფლებები ევროკავშირში, იურიდიული და სოციალურ მეცნიერებათა ფაკულტეტის საბაკალავრო და სამაგისტრო პროგრამების სასწავლო გეგმებშია ჩაშენებული.
მალხაზ ნაკაშიძე კი ამბობს, რომ კურსი, რომელსაც დაარქვეს ევროკავშირის პოლიტიკა, საჯარო მმართველობის საბაკალავრო პროგრამის ხელმძღვანელმა ირაკლი მანველიძემ აიღო.
„რეალურად, ევროკავშირის კურსი ამოიღეს და სანაცვლოდ დატოვეს საგნები, რომელსაც დაარქვეს ევროკავშირის პოლიტიკა, რეალურად ეს არ არის ის პროგრამა, რაც მე მქონდა შემუშავებული და ამ კურსსაც წაიკითხავს ირაკლი მანველიძე, რომელსაც არც კომპეტენცია აქვს ამ საგნებში და არც აქამდე კითხულობდა ევროკავშირის სამართალზე არაფერს“, – ამბობს მალხაზ ნაკაშიძე.
მისი თქმით, უნივერსიტეტის ადმინისტრაციის მხრიდან მსგავსი დამოკიდებულების საფუძველი მისი სამოქალაქო აქტიურობაა.
„მიზეზი იყო ალბათ ჩემი დამოკიდებულება უკრაინის ომთან დაკავშირებით, რუსული კანონის საწინააღმდეგო აქციებში ვმონაწილეობდი და ყოველთვის მაქვს კრიტიკული პოზიცია სხვადასხვა საკითხის მიმართ. ვფიქრობ, ამის გამო ხდება ეს ყველაფერი.
რა განცხადებაც გაავრცელეს, ესეც არის სამარცხვინო და მაგასაც აუცილებლად ვუპასუხებ“, – ამბობს მალხაზ ნაკაშიძე.
