რუსეთის ფედერაციის საბჭოს საერთაშორისო ურთიერთობების კომიტეტის თავმჯდომარე გრიგორი კარასინი ეხმიანება საქართველოში ევროკავშირის ელჩის, პაველ ჰერჩინსკის განცხადებას იმის შესახებ, რომ თუ ქართველი ხალხი აირჩევს ცხოვრებას ერთპარტიულ ქვეყანაში, ის EU-ის წევრი ვერც 2030 წელს გახდება.
„ვიღაც ჰერჩინსკი, ევროკავშირის ელჩი საქართველოში, ეროვნებით პოლონელი, თბილისში გააფთრდა. მან გამაოცა თავისი უხეშობით და პირდაპირობით“, – წერს კარასინი თავის ინსტაგრამ არხზე.
„შეგახსენებთ, რომ ეს ითქვა საქართველოს პარლამენტის არჩევნების ზუსტად წინ, ქვეყანაში დაძაბული პოლიტიკური ბრძოლის ატმოსფეროში. იმის თქმა, რომ ეს დიპლომატიური ეთიკის დარღვევაა, არაფერია! რეალურად ხდება დამოუკიდებელი ქვეყნის მოქალაქეების პირდაპირი შანტაჟი და დაშინება. მსგავსი რამის მოთმენა სერიოზული გამოცდაა ქართული თავმოყვარეობისთვის“, – წერს კარასინი.
რუსული პროპაგანდისტული მედიის საინფორმაციო ბადეში მნიშვნელოვანი სივრცე ეთმობა საქართველოში წინასაარჩევნოდ მიმდინარე მოვლენების განხილვასა და პროპაგანდისტული მესიჯების გაჟღერებას რუსი ოფიციალური პირებისა თუ კრემლის პროპაგანდისტების საშუალებით.
„საქართველოს ხელისუფლების მოქმედებების, გადაწყვეტილებებისა და განცხადებების შედეგია, რომ ევროკავშირის 27 ქვეყნის ლიდერებმა გადაწყვიტეს, შეეჩერებინათ საქართველოს გაწევრიანების პროცესი. ასე რომ, პრობლემა არ არის ბრიუსელში, ვაშინგტონში ან კიევში. პრობლემაც და მისი გადაწყვეტაც არის აქ, საქართველოში“, – განაცხადა დღეს, 18 ოქტომბერს პაველ ჰერჩინსკიმ.
მან ასევე გაიხსენა, რომ ევროკომისიის გაფართოების პირველი ანგარიშით საქართველოს წინაშე წაყენებული ერთ-ერთი საკვანძო მოთხოვნა ანტიდასავლური და ანტიევროკავშირის დეზინფორმაციული პროპაგანდის შეწყვეტა იყო, რომელიც შეჩერების ნაცვლად გაფართოვდა.
დღეს, 18 ოქტომბერს, ევროპული საბჭოს 17 ოქტომბრის გადაწყვეტილების კომენტირებისას თბილისის მერმა კახა კალაძემ ევროკავშირი საბჭოთა კავშირს შეადარა. მან თქვა, „ბატონყმობაში ვიყავით საბჭოთა კავშირის პერიოდშიც და არ გვჭირდება ისეთი კავშირები, სადაც იგივე დამოკიდებულება იქნება“.
ევროპული საბჭოს სხდომა, იგივე ევროკავშირის ლიდერების სამიტი მინიმუმ წელიწადში ოთხჯერ იკრიბება. 17 ოქტომბრის სხდომაზე ევროპულმა საბჭომ იმსჯელა საქართველოს შესახებაც და დაასკვნა, რომ საქართველოს მთავრობის ქმედებები დე ფაქტო აჩერებს გაწევრიანების პროცესს. ევროკავშირი მოელის, რომ საპარლამენტო არჩევნები იქნება თავისუფალი და სამართლიანი.
ამავე თემაზე:
ლავროვს იმედი აქვს, რომ „ქართველი მეზობლები“ 3+3 პლატფორმაში ჩაერთვებიან
