„მოვუწოდებთ ეკონომიკის სამინისტროს, ვალდებულებების შესრულებამდე არ გასცეს ცათამბჯენების მშენებლობის ნებართვა,“ – განაცხადა დღეს, 11 ოქტომბერს გამართულ ბრიფინგზე აზა გაბუნიამ, რომელიც კოალიცია „ძლიერი საქართველოს“ აჭარის უმაღლესი საბჭოს საარჩევნო სიის წევრია.
ბრიფინგზე გარემოს ეროვნულ სააგენტოს მონიტორინგისკენ მოუწოდეს, რომ კომპანია „ამბასადორი ბათუმი აილენდმა“ ნაკისრი ვალდებულებები შეასრულოს.
საუბარია ახალ ცათამბჯენებზე – ბათუმში ხელოვნური კუნძულის მოწყობამდე „ამბასადორი“ ხელოვნურ ნახევარკუნძულზე 5 ცათამბჯენის აშენებას გეგმავს.
„14 აგვისტოს გარემოს ეროვნულ სააგენტოს გადაწყვეტილების ბრძანების შესაბამისად, „ამბასადორ ბათუმი აილენდს” ახალი ვალდებულებები დაეკისრა, ნაწილის შესასრულებლად სამთვიანი პერიოდი მიეცა, მითითებული ვადის ამოწურვამდე ერთი თვეა დარჩენილი, თუმცა არცერთი ვალდებულება ამ დრომდე არ არის შესრულებული.
ამ ფონზე კომპანია ნახევრად მშენებარე კუნძულზე 5 ცათამბჯენის მშენებლობის ნებართვას ითხოვს,“ – განაცხადა აზა გაბუნიამ.
„ჩემთვის, როგორც წარმომადგენლობითი ორგანოს წევრისთვის, ინფორმაცია ამ პროექტზე არის დამალული, დახურული,“ – ამბობს ვაჟა დარჩია, ბათუმის საკრებულოს წევრი და „ძლიერი საქართველოს“ აჭარის უმაღლესი საბჭოს საარჩევნო სიის წევრი.
ვაჟა დარჩია და აზა გაბუნია
„ეს კუნძული საერთოდ ამოღებულია ბათუმის გენერალური გეგმის დოკუმენტიდან, ეს დოკუმენტი განსაზღვრავს სამომავლოდ ქალაქის ურბანულ პოლიტიკას და მასში ჩვენი მოქალაქეების ჯიბიდან გადახდილია 2 მილიონ ლარზე მეტი.
წარმოუდგენელია ქალაქში შენდებოდეს ცალკე ქალაქი და ის არ იყოს ასახული დოკუმენტში, რომელიც ასახავს ქალაქის სამომავლო ურბანულ პოლიტიკას,“ – განაცხადა ვაჟა დარჩიამ.
ამ თემაზე:
კუნძულის მოწყობამდე „ამბასადორი“ ხელოვნურ ნახევარკუნძულზე 5 ცათამბჯენის აშენებას გეგმავს
