ფოტოზე, რომელსაც ხედავთ, წლის და 1 თვის აჩი დუმბაძეა, რომელიც ხულოში, სოფელ ხიხაძირში ცხოვრობს. აჩის ძალიან უყვარს სიცილი, საზამთრო და ბურთებით თამაში, მაგრამ აჩის არაფერი ესმის, მას დაბადებიდან ორივე ყურში სმენის სრული დაქვეითება აქვს.
თუ აჩის სმენა არ ექნება, ის საუბარსაც ვერ დაიწყებს. მას ცოტა დრო აქვს იმისთვის, რომ საკმაოდ ძვირადღირებული მკურნალობის და იმპლანტის შედეგად პირველად გაიგონოს მშობლების, ოჯახის წევრების, ცხოველების, ქარის, წვიმის და ბუნების ხმები.
ამისთვის აჩის ოჯახს მინიმუმ 40 ათასი დოლარი სჭირდება.
ეს თანხაა საჭირო ოპერაციისთვის, რომელიც აჩის თურქეთში, სტამბოლის ერთ-ერთ კლინიკაში უნდა გაუკეთონ. ხარჯთაღრიცხვა ოჯახმა კლინიკიდან უკვე მიიღო და ახლა აჩის ოჯახი ცდილობს ეს თანხა როგორმე იშოვოს.
ნატო აბაშიძე აჩის დედაა. აჩი მისი პირველი შვილია. ნატო ამბობს, რომ აჩის დაბადების შემდეგ, როცა მალევე გაირკვა, რომ ბავშვს არ ესმოდა, ექიმიდან ექიმთან დადიან ზუსტი დიაგნოზისა და გამოსავლის ძიებაში.
„სანამ სამშობიაროდ გამოგვწერდნენ, იყო სმენის სკრინინგი და აჩიმ ვერ გაიარა. მითხრეს, ორ კვირაში გადაამოწმეთ, გოგირდის საცობი არ იყოსო, რადგან არ ჰქონია გენეტიკური წინასწარგანწყობა აჩის, არც პრობლემური ორსულობა მქონია, არც დღენაკლული დაბადებულა.
35 დღის იყო, რომ გადავამოწმეთ და ისევ რომ ვერ გაიარა სკრინინგი, მას შემდეგ ექიმებში დავდივართ. 11 თვის იყო, როცა სტამბოლში მოხდა აჩის სრული დიაგნოსტიკა.
აჩის დიაგნოზია სმენის სრული დაქვეითება ორივე ყურში. გარდა ამისა, აჩის აქვს „კოხლეარის ნერვები“ ძალიან წვრილი. როცა პირველად სტამბოლში წავიყვანეთ და გამოკვლევები ჩავუტარეთ, ეს ნერვები საერთოდ არ აღმოაჩნდა. შემდეგ გაკეთდა დამიზნებითი ემერტე, რომელიც სტამბოლში მხოლოდ ორ ადგილას კეთდება და აღმოაჩნდა კოხლეარის ნერვები, მხოლოდ ძალიან წვრილი.
გადაწყდა, რომ უნდა გაკეთდეს ოპერაცია შუა ყურში, მაგრამ ექიმმა დასკვნაში მიუთითა ისიც, რომ მეორე ვარიანტად, თუ ვერ მივიღეთ სმენის ხარისხი და ვერ გაიგონა ამ ოპერაციის შედეგად, უნდა გაკეთდეს მეორე ოპერაცია ტვინის ღეროში.
ამ ყველაფერს მნიშვნელობა აქვს ახლა, ადრეულ ასაკში. ძალიან კარგი იქნებოდა ერთ წლამდე ასაკში რომ გაგვეკეთებინა, მაგრამ არ გვქონდა ოჯახს შესაძლებლობა, რომ ამხელა თანხა გვეშოვა. ორი წლის შემდეგ ამ ოპერაციას ეფექტი არ ექნება და საერთოდ არ აკეთებენ სტამბოლში.
მოვუწოდებ ყველა ადამიანს, ვისაც რისი შესაძლებლობაც ექნება, თუნდაც ერთი ლარით თუ დაგვიდგებიან გვერდში.
ძალიან მადლიერი ვიქნები, თუ ჩემი შვილი შეძლებს, რომ გაიგონოს, დაილაპარაკოს… ამაზე დიდი ბედნიერება ჩემთვის არ იარსებებს, მეორედ დავიბადები.
ერთ წელია ვიბრძვი, რომ ზუსტი დიაგნოზი გვქონდეს, ვიბრძვით იმისთვის, რომ აჩიმ გაიგონოს“, – ამბობს ნატო აბაშიძე.
ოჯახმა უკვე მიმართა საქართველოს ჯანდაცვის სამინისტროს დახმარებისთვის.
ნატო ამბობს, რომ დაფინანსების მიღების შემთხვევაშიც არ იქნება თანხა საკმარისი აჩის მკურნალობისთვის:
„ჯანდაცვის სამინისტროს საზღვარგარეთ დაფინანსების პროგრამით 10 000 დოლარი აქვს მაქსიმალური გამოყოფილი. თუ საქართველოს ჯანდაცვის სამინისტრო დაგვაფინანსებს, შემდეგ 30 ათასი ლარით დაგვაფინანსებს აჭარის ჯანდაცვის სამინისტრო. ეს ჯამში თითქმის 20 ათასი დოლარია და 20 000 დოლარი გვრჩება, რაც უნდა შევაგროვოთ.
გარდა ამისა, ოპერაციის შემდეგ ერთი თვის განმავლობაში არ შეიძლება აჩისთვის ფრენა, ეს ერთი თვე უნდა იყოს კონტროლზე, რადგან ერთი თვის შემდეგ უნდა ჩართონ აპარატი, ეს პერიოდი უნდა ვიყოთ სტამბოლში და იმედია ჯანდაცვა დაგვაფინანსებს და საზოგადოება დაგვეხმარება, თორემ ამდენს უბრალოდ ვერ გავწვდებით“, – ამბობს ნატო.
_______________________________________________
აჩის დახმარების მსურველებს თანხის გადარიცხვა შეუძლიათ შემდეგ ანგარიშზე:
საქართველოს ბანკი: GE93BG0000000045978300
მიმღები: ნატო აბაშიძე [აჩის დედა]
