დღეს, 21 აგვისტოს, დაბა ოჩხამურელებმა ქობულეთთან საერთაშორისო მაგისტრალი გადაკეტეს. დაბის მცხოვრებლები წყალს ითხოვენ.
მოსახლეობის თქმით, დაბას წლებია არ აქვს სასმელი წყალი, უკანასკნელი ერთი კვირის განმავლობაში კი აღარც ტექნიკური წყალი არ მიეწოდებათ.
„გაუსაძლისი მდგომარეობა გვაქვს. წლებია სასმელ წყალს ხელით ვეზიდებით დაბის მოსახლეობა – სამ ადგილასაა სასმელი წყლის აღება ოჩხამურში შესაძლებელი მხოლოდ. ჩემი სახლიდან 2 კილომეტრითაა დაშორებული ეს ადგილი. ამას გარდა გრაფიკით გვაქვს წყალი, რომელსაც მხოლოდ სარეცხისთვის და საბანაოდ ვიყენებთ. ერთი კვირაა ეს წყალიც შეგვიწყდა.
ავტობანის გადაკეტვის გარდა სხვა ვერაფერი გავაკეთეთ. წლებია ვითხოვთ ქობულეთის მერიისგან პრობლემის მოგვარებას, მაგრამ აქამდე ყურადღება არავინ მოგვაქცია,“ – უთხრა „ბათუმელებს“ დაბა ოჩხამურის მკვიდრმა ნატო გაბუნიამ. ის დღეს აქციის ერთ-ერთი მონაწილე იყო.
აქციაში იღებდა მონაწილეობას იამზე ცალქალამანიძეც, რომელიც დაბა ოჩხამურის საკრებულოს წევრია ენმ-იდან.
„საშინელი ანტისანიტარიაა. წყალი არ გვაქვს. ერთი ჭაა, იქიდან ვეზიდებოდით, ახლა ის ჭაც შრება და არ ყოფნის ხალხს წყალი. ერთი საათით უშვებენ სოფელში წყალს კვირის განმავლობაში. ხალხი ადგა და გადაკეტა გზა. პოლიციამ დაგვშალა. ახლაც მტკივა ხელები ისე გამოგვათრიეს,“ – უყვება „ბათუმელებს“ იამზე ცალქალამანიძე.
ოჩხამურელებთან ავტობანის გადაკეტვის შემდეგ ქობულეთის მერის მოადგილე მივიდა. როგორც დაბის მცხოვრებლები ამბობენ, მერის მოადგილე ოჩხამურელებს დაპირდა, რომ „ხვალ 11 საათამდე იქნება დაბაში წყალი“.
„ბათუმელები“ კომენტარისთვის დაუკავშირდა ქობულეთის მერიას. კომენტარის გაკეთების შემთხვევაში მას აქვე შემოგთავაზებთ.
ოჩხამურში წყლის პრობლემის არსებობაზე „ბათუმელები“ 2 წლის წინაც წერდა.
ვერ დალევ, პურს ვერ მოზელ, თეფშებს რომ ვრეცხავ, ისიც მეზიზღება – უწყლო ოჩხამური
