ბათუმის მერიას „ძაღლების და კატების მოვლა-პატრონობის წესში“ ცვლილება შეაქვს, რითაც აღნიშნული წესის „სრულყოფას“ გეგმავს. ამ მიზნით მერია მიკედლებული ცხოველის რეგისტრაციის, ასევე მონაცემთა ბაზის წარმოების მეთოდს აკონკრეტებს და არსებულ წესში ცალკე მუხლად ამატებს.
„ბათუმში ძაღლების და კატების მოვლა-პატრონობის და მათი პოპულაციების მართვის წესი“ ბათუმის საკრებულომ 2014 წლის თებერვალში დაამტკიცა და ის იმავე წლის ივლისიდან ამოქმედდა. ამ წესით, ბათუმში ბინადარი ცხოველები დაყოფილნი არიან შემდეგ კატეგორიებად: პატრონიანი; უმეთვალყურეო; მიკედლებული და უპატრონო.
ასევე განმარტებულია, რომ „მიკედლებული ცხოველი“ – ეს არის „ცხოველი, რომლის მეთვალყურე პირს უფლებამოსილ ორგანოში ცხოველის რეგისტრაციის მომენტიდან აქვს აღებული ვალდებულება მის ვეტერინარული სამედიცინო მომსახურების განხორციელების უზრუნველყოფაზე“.
ცხოველს კი, მიკედლებულის სტატუსი ენიჭება შესაბამისი პირის მიერ უფლებამოსილ ორგანოში მისი ამგვარად რეგისტრაციის მომენტიდან.
აღნიშნულ წესში დღემდე არ არის დაკონკრეტებული, რომელ „უფლებამოსილ ორგანოში“ და როგორ შეუძლია დაინტერესებულ პირს ძაღლის ან კატის მიკედლებულად დარეგისტრირება. არც ის არის განსაზღვრული, როგორ უნდა შედგეს მიკედლებულ ცხოველთა თუ მიმკედლებელ პირთა მონაცემთა ბაზა.
საკრებულოს მიერ 10 წლის წინ დამტკიცებულ და ძალაში შესულ დადგენილებაში მხოლოდ ახლა ამატებენ 41-ე მუხლს, რომელიც სწორედ მიკედლებული ცხოველის რეგისტრაციისა და მონაცემთა ბაზის წარმოების წესებს განსაზღვრავს.
ცვლილების პროექტის მიხედვით:
- ცხოველის რეგისტრაციას მიკედლებულის სტატუსის მინიჭების მიზნით, ახორციელებს მერიის მუნიციპალიტეტის უფლებამოსილი ორგანო ან ცხოველთა თავშესაფრები, მიმკედლებლის შესაბამისი განაცხადის საფუძველზე ამ წესით დადგენილი პირობებით.
- მიმკედლებელი ვალდებულია მოახდინოს ცხოველის რეგისტრაცია, რეგისტრაციის ვალდებულების წარმოშობიდან ერთი თვის ვადაში.
- რეგისტრაციას, ცხოველის მიკედლების ფაქტის დადგენის მიზნით, ექვემდებარება მიმკედლებლის ფაქტობრივი მეთვალყურეობის ქვეშ არსებული არარეგისტრირებული ცხოველი.
პროექტის მიხედვით, „რეგისტრაციისას გაიცემა სარეგისტრაციო მოწმობა, ასევე ივსება ცხოველთა ახალი სარეგისტრაციო და ჩატარებული პროცედურების შესახებ მონაცემები, რომლის ფორმებსაც ამტკიცებს „ბათუმის მუნიციპალური ინსპექცია“.
ცხოველს ენიჭება სარეგისტრაციო მოწმობის ნომრის შესაბამისი პირადი ნომერი. სარეგისტრაციო მონაცემების შეცვლისას, რეგისტრაციის განმახორციელებელი ორგანო უზრუნველყოფს შესაბამისი ცვლილებების შეტანას სარეგისტრაციო მონაცემებში.“
ზოგადად, მიკედლებული ცხოველი თავისუფლად ბინადრობს გარკვეულ სივრცეში [მაგალითად საერთო ეზოში, სკვერში და ა.შ.] და მისი, ასე ვთქვათ, სახლში ყოლა [როგორც „პატრონიანი“ ცხოველის] არაა აუცილებელი.
ცხოველის მიმკედლებელი პასუხისმგებელი იქნება მიკედლებული ცხოველის ჯანმრთელობაზე, მოვლა-პატრონობაზე და მის კეთილდღეობაზე, ასევე სხვა ადამიანებისა და ცხოველების მიმართ საკუთარი ცხოველისგან მომდინარე საფრთხეების თავიდან აცილებაზე.
ცხოველის აგრესიის ან/და შემდგომი სათანადო მოვლა-პატრონობის შეუძლებლობის ობიექტური წინაპირობების დადგომის შემთხვევაში, მიმკედლებელი ვალდებულია მიმართოს უფლებამოსილ ორგანოს ცხოველის თავშესაფარში გადაყვანის და შემდგომი პროცედურების ჩატარების მიზნით.
ამ წესის დარღვევისთვის გატარდება საქართველოს ადმინისტრაციულ სამართალდარღვევათა კოდექსის 103-ე მუხლით გათვალისწინებული ზომები – აღნიშნულია საკრებულოს დადგენილების პროექტში.
აღნიშნული კოდექსის 103-ე მუხლი ძაღლისა და კატის ყოლის წესების დარღვევას ეხება და შესაბამის ჯარიმებს ითვალისწინებს:
- „ძაღლისა და კატის ყოლის წესების დარღვევა – გამოიწვევს მოქალაქის დაჯარიმებას შრომის ანაზღაურების მეხუთედ მინიმალურ ოდენობამდე, ხოლო თანამდებობის პირის დაჯარიმებას – შრომის ანაზღაურების ნახევარ მინიმალურ ოდენობამდე.
ამ ადმინისტრაციული სამართალდარღვევის განმეორებით ჩადენა 1 წლის განმავლობაში − გამოიწვევს ძაღლის/კატის მფლობელის დაჯარიმებას 50 ლარის ოდენობით.
- ძაღლის საბლის ან ალიკაპის გარეშე ყოლა ღია სივრცეში, მათ შორის, ბულვარში, პარკში ან სკვერში [გარდა სპეციალურად გამოყოფილი ადგილებისა], − გამოიწვევს ძაღლის მფლობელის დაჯარიმებას 150 ლარის ოდენობით.
ამ ადმინისტრაციული სამართალდარღვევის განმეორებით ჩადენა 1 წლის განმავლობაში კი – გამოიწვევს ძაღლის მფლობელის დაჯარიმებას 300 ლარის ოდენობით.“
„ბათუმში ძაღლების და კატების მოვლა-პატრონობის და მათი პოპულაციების მართვის წესში“ ცვლილებებს ბათუმის საკრებულო 2024 წლის 9 აგვისტოს სხდომაზე განიხილავს.
____
მიუსაფარი ცხოველების მოვლა-პატრონობა ბათუმში ამ დრომდე ერთ-ერთი დაუძლეველი გამოწვევაა:
