საქართველოს მთავრობამ შპს „ამბასადორი ბათუმი აილენდი“ სასარგებლო წიაღისეულის მოპოვების ლიცენზიისგან გაათავისუფლა. კომპანიამ ბათუმში ხელოვნური ნახევარკუნძულები და კუნძული უნდა ააშენოს.
მთავრობამ შესაბამისი განკარგულება, რომელსაც ხელს პრემიერი ირაკლი კობახიძე აწერს, 2024 წლის პირველ აგვისტოს გამოსცა. ამ განკარგულებით „ამბასადორს“ უფლება აქვს 1 წლის განმავლობაში 500 ათასი კუბური მეტრი სასარგებლო წიაღისეული [ხალას ანდეზიტები, ბაზალტები და ტუფობრექჩიები] ქობულეთის მუნიციპალიტეტში, სოფელ ხალას მიმდებარე ტერიტორიაზე მოიპოვოს.
„სახელმწიფოებრივი და საზოგადოებრივი ინტერესების გათვალისწინებით, ქალაქ ბათუმში, ოდისეი დიმიტრიადის ქუჩის მიმდებარედ, შავი ზღვის აკვატორიაში ხელოვნური კუნძულის/ნახევარკუნძულის მოწყობის მიზნით, შპს „ამბასადორი ბათუმი აილენდი“ 12 თვის ვადით გათავისუფლდეს სასარგებლო წიაღისეულის მოპოვების ლიცენზიისაგან…“ – აღნიშნულია მთავრობის განკარგულებაში.
ამავე განკარგულების მიხედვით, ლიცენზიისაგან გათავისუფლებული „ამბასადორი ბათუმი აილენდი“ ვალდებულია:
- „მოპოვებული სასარგებლო წიაღისეული გამოიყენოს მხოლოდ ამ განკარგულების პირველი პუნქტით განსაზღვრული მიზნისათვის [კუნძულის, ნახევარკუნძულების მშენებლობისთვის];
- სასარგებლო წიაღისეულის მოპოვების ლიცენზიისაგან გათავისუფლებისათვის, ამ განკარგულების ძალაში შესვლიდან ერთი თვის ვადაში საქართველოს სახელმწიფო ბიუჯეტში უზრუნველყოს 121 ათას 739 ლარის გადახდა“.
შესაბამისად, კუნძულის მშენებელი კომპანია 1 კუბურ მეტრ ინერტულ მასალაში 24 თეთრს გადაიხდის.
„ამბასადორის“ მიერ, ლიცენზიისაგან გათავისუფლების საფუძველზე, წიაღით სარგებლობის პირობების შესრულების ზედამხედველობა დაევალა მინერალური რესურსების ეროვნულ სააგენტოს.
„ამბასადორმა“ კი, „სასარგებლო წიაღისეულის მოპოვების ვადის გასვლიდან ორი კვირის ვადაში სააგენტოს უნდა წარუდგინოს ინფორმაცია მოპოვებული ბუნებრივი რესურსის ოდენობის შესახებ.“
ხელოვნური ნახევარკუნძულის მშენებლობა ბათუმში / 03.07.2024
საქართველოს მთავრობამ 2024 წლის პირველ აგვისტოს კიდევ ერთი განკარგულება გამოსცა, რომლითაც ცვლილება შევიდა შპს „ამბასადორი ბათუმი აილენდისათვის“ აღნაგობის უფლებით გადაცემაზე თანხმობის გაცემის შესახებ“ საქართველოს მთავრობის 2021 წლის 27 სექტემბრის განკარგულებაში.
ახალი ცვლილებით, ძველ განკარგულებაში მე-4 პუნქტის შემდეგ დაემატა შემდეგი შინაარსის 4¹ და 4² პუნქტები:
„4¹. ამ განკარგულების მე-4 პუნქტით გათვალისწინებული მინიმალური ფართობის შესაბამისი ნახევარკუნძულების/კუნძულისა და დამცავი მოლოს (თითოეული მათგანის დამოუკიდებლად) შპს „ამბასადორი ბათუმი აილენდისათვის“ საკუთრებაში გადაცემის შემდგომ, დამატებით შესაბამისი ნახევარკუნძულის/კუნძულის ყოველი 4 ჰა ფართობის შექმნის (მიუხედავად იმისა, იქნება თუ არა ექსპლუატაციაში მიღებული და მშენებლობა სრულად დასრულებული) შემდგომ, შპს „ამბასადორი ბათუმი აილენდის“ მიერ საკუთრების უფლების მოპოვების თაობაზე მოთხოვნის წარდგენიდან 3 თვის ვადაში სახელმწიფო ქონების ეროვნულმა სააგენტომ და ეკონომიკისა და მდგრადი განვითარების სამინისტრომ უზრუნველყონ ამავე უძრავი ქონების/შექმნილი მიწის შპს „ამბასადორი ბათუმი აილენდისათვის“ სიმბოლურ ფასად, 1 ლარად, საკუთრების უფლებით გადაცემის თაობაზე შესაბამისი განკარგულების პროექტის ინიციირება საქართველოს მთავრობის წინაშე, იმ პირობით, რომ საპრივატიზებო ქონებაზე გავრცელდება შესაბამისი აღნაგობის ხელშეკრულებით განსაზღვრული შესასრულებელი ვალდებულებები ამავე ხელშეკრულებით დადგენილი ვადით.
4². ამ განკარგულების მე-4 და 4¹ პუნქტების შესაბამისად, შპს „ამბასადორი ბათუმი აილენდისათის“ საკუთრებაში გადაცემულ ცალკეულ ნახევარკუნძულზე/კუნძულზე დამტკიცებული განაშენიანების დეტალური გეგმის/სანებართვო პირობების შესაბამისად და ამ განკარგულების მე-2 პუნქტის „ბ.ვ“ ქვეპუნქტით გათვალისწინებული ვალდებულების შესრულების მიზნით, შექმნილი შესაბამისი შენობა-ნაგებობ(ებ)ის მშენებლობის დასრულებისა და ექსპლუატაციაში შეყვანის დამადასტურებელი დოკუმენტ(ებ)ის ქონების ეროვნული სააგენტოს მიერ დადასტურების შემდგომ, ავტომატურად გაუქმდეს მშენებლობადასრულებული შენობა-ნაგებობ(ებ)ის განაშენიანების კონტურზე რეგისტრირებული შესაბამისი საპრივატიზებო პირობების რეგისტრაცია იმ პირობით, რომ ამ დროისათვის აგრეთვე სრულად დასრულებული (ექსპლუატაციაში მიღებული) იქნება იმ ნახევარკუნძულის/კუნძულის შექმნა, რომელზეც მდებარეობს აღნიშნული შენობა-ნაგებობა/ნაგებობები.“.
შპს „ამბასადორი ბათუმი აილენდისთვის“ ზღვაში ტერიტორიის გადაცემაზე გაფორმებულ სასყიდლიანი აღნაგობის სხვა ხელშეკრულებაში ორი ცვლილება მთავრობამ 2023 წელსაც შეიტანა.
ამ ცვლილებებთან დაკავშირებული დოკუმენტები, მათ შორის მთავრობის შესაბამისი განკარგულება, „ბათუმელებმა“ ქონების ეროვნული სააგენტოდან და საქართველოს მთავრობიდან 2023 წლის 2 ოქტომბერს გამოითხოვა, თუმცა საჯარო უწყებებმა ოფიციალურად გამოთხოვილი დოკუმენტები დამალეს – სააგენტომ ცვლილებებთან დაკავშირებული დოკუმენტები არ მოგვაწოდა, მთავრობამ კი – თავისივე განკარგულება.
ვრცლად: მთავრობა მალავს ხელოვნური კუნძულის შესახებ დოკუმენტებს – რა შეცვალეს ხელშეკრულებაში
ამ ეტაპზე ბათუმის მუნიციპალურ ინსპექციაში მიმდინარეობს შესწავლა „ამბასადორი ბათუმი აილენდის“ უკანონო მშენებლობაზე – ბათუმში, ოდისეი დიმიტრიადის ქუჩაზე, სახელმწიფოს ტერიტორიაზე კომპანიამ მშენებლობა ქალაქის მერის ნებართვის გარეშე დაიწყო.
ვრცლად: მუნიციპალურ ინსპექციას „ამბასადორი აილენდის“ უკანონო მშენებლობა ჯერ კიდევ არ შეუსწავლია
„ამბასადორი ბათუმი აილენდი“ ზღვაში ამჯერად ხელოვნურ ნახევარკუნძულს აშენებს. ხელოვნური კუნძულის მოწყობის პროექტთან დაკავშირებით კი კომპანიამ მიმდინარე წლის ივნისში გარემოს ეროვნულ სააგენტოში დამატებითი დოკუმენტაცია წარადგინა.
ამ თემაზე:
ხელოვნური კუნძული ბათუმში – რას პასუხობს კომპანია გზშ-ს ხარვეზებზე სააგენტოს
