მიკროსაფინანსო ორგანიზაციების ნაწილი ლარის ბანკნოტების გადაცვლაზე სხვა ნომინალის ლარის ბანკნოტებზე უარს ამბობს.
ერთ-ერთმა მოქალაქემ სოციალურ ქსელში დაწერა, რომ მას ბათუმში, მიკროსაფინანსო ორგანიზაციის წარმომადგენელმა 50- ლარიანის წვრილ კუპიურებად დაშლაზე უარი განუცხადა და უთხრა, რომ ამას შიდაგანაწესი უკრძალავდა.
“მიკროსაფინანსო ორგანიზაციებს არ აქვთ ვალდებულება ფულის გადაცვლაზე, კომერციულ ბანკებს – კი,”- უთხრეს “ბათუმელებს” საქართველოს ეროვნული ბანკის პრესსამსახურში.
ბანკისგან მიღებულ წერილში ვკითხულობთ: „დადგენილი წესი არ ავალდებულებს მიკროსაფინანსო ორგანიზაციებს ლარის ბანკნოტების გამოცვლას და ეს დამოკიდებულია თითოეული საფინანსო ორგანიზაციის შიდა პროცედურაზე. ამასთან, „კომერციულ ბანკებში ნაღდ ფულსა და სხვა ფასეულობასთან დაკავშირებული ოპერაციების წარმოების წესის“ თანახმად, კომერციული ბანკი ვალდებულია ყოველგვარი შეფერხებისა და საზღაურის გარეშე უზრუნველყოს ლარის ბანკნოტებისა და მონეტების გამოცვლა, ან გადაცვლა სხვა ნომინალის ლარის ბანკნოტებზე ან მონეტებზე (გარდა ყალბი ან/და გადასახდელად უვარგისი ლარის ბანკნოტების და მონეტებისა). გასათვალისწინებელია, რომ ეროვნული ბანკის მიერ არ არის დადგენილი რაიმე აკრძალვა მიკროსაფინანსო ორგანიზაციების მიერ ლარის ბანკნოტებისა და მონეტების გადაცვლის აკრძალვასთან დაკავშირებით.“
