მტირალას ეროვნული პარკის მიმდებარედ ადგილობრივმა მაცხოვრებლებმა მურა დათვის ბელი იპოვეს – ინფორმაციას ამის შესახებ მტირალას ეროვნული პარკი ავრცელებს.
„გამომდინარე იქიდან, რომ მისი დაბრუნება ბუნებრივ გარემოში ამ ეტაპზე საფრთხის შემცველია, მტირალას ეროვნული პარკის რეინჯერების და გარემოსდაცვითი ზედამხედველობის დეპარტამენტის თანამშრომლების ჩართულობით, დათვის ბელი ბათუმის ზოოლოგიურ პარკს გადაეცა“ – წერს მტირალას ეროვნული პარკი ფეისბუქზე.
დათვები ზამთრის პერიოდში შობენ 2-3 ბელს, გაზაფხულამდე თბილ ბუნაგში ჰყავთ გამოსაზრდელად, გაზაფხულის დადგომისთანავე დედას ბუნაგიდან გამოჰყავს თავისი ბელები.
საქართველოში გავრცელებული მურა დათვი შეტანილია საქართველოს „წითელ ნუსხაში“, როგორც გადაშენების საფრთხის წინაშე მყოფი სახეობა.
- ამავე თემაზე: „დათვი ბელებს არ ტოვებს, ბრაკონიერი მარტივად კლავს მას, შეშინებული ბელები კი მიჰყავს სახლში“
