დღეს, 21 ივლისს, №79 ბათუმის საარჩევნო ოლქში, ცენტრალური საარჩევნო კომისიის თავმჯდომარე, თამარ ჟვანია, ცესკოს სხვა წევრებთან ერთად აჭარასა და გურიაში მოქმედი არასამთავრობო ორგანიზაციებისა და პოლიტიკური პარტიების წარმომადგენლებს შეხვდა. შეხვედრას ასევე ესწრებოდნენ აჭარის უმაღლესი საარჩევნო კომისიის თავმჯდომარე, სხვა წევრებთან ერთად და აჭარისა და გურიის რეგიონების ძირითადი და დამხმარე საოლქო საარჩევნო კომისიის წევრები.
სამუშაო შეხვედრის მონაწილეებს, ცესკოს წარმომადგენლებმა ძირითადი და დამხმარე საოლქო საარჩევნო კომისიებისთვის შემუშავებული ინსტრუქციები გააცნეს და მათ შეკითხვებს უპასუხეს.
თამარ ჟვანიამ შეხვედრა დადებითად შეაფასა: „მთავარია, ვინც დღეს შეხვედრას ესწრებოდა, მათ მიიღეს ის ინფორმაცია და ინსტრუქცია, რომელიც ცენტრალურმა საარჩევნო კომისიამ დაადგინა ფუნქციების თვალსაზრისით და ფაქტობრივად ამ კონკრეტულ საკითხთან დაკავშირებით რაიმე კრიტიკული მოსაზრება ან შენიშვნა არ გამოუთქვამთ“.
არასამთავრობო ორგანიზაცია „სამართლიანი არჩევნების“ კოორდინატორმა, მადონა ბერიძე ჟურნალისტებთან საუბარში აღნიშნა, რომ ცვლილებებმა შესაძლოა გარკვეული პრობლემები გამოიწვიოს ძირითადი ოლქებისათვის ადმინისტრირების გართულების თვალსაზრისით, რადგანაც ძირითადი ფუნქციებით დატვირთულნი სწორედ ისინი არიან: „ასევე გადაწყვეტილებების მიღების თვალსაზრისით გარკვეულ დროში გაჭიანურების პრობლემას ვხედავთ, განსაკუთრებით საჩივრებთან დაკავშირებით… გაძნელდება საჩივრების განხილვის დროს მოწმეების დასწრების უზრუნველყოფა“, – აღნიშნა მადონა ბერიძემ, თუმცა იქვე დასძინა, რომ ის ფუნქცია-მოვალეობები, რაც უკვე განისაზღვრა, ინსტრუქციის შესაბამისად ვეღარ შეიცვლება, შესაბამისად, ძალაში დარჩება და იმოქმედებს ამ არჩევნებზე.
