მოსამართლე თამარ ბეჟანიშვილი განიხილავს მ.მ.-ს საქმეს. მას გამოძიება პროსტიტუციისთვის ადგილის გადაცემას ედავება. სასტუმრო ჯორჯიაშვილის ქუჩაზე მდებარეობს, ხოლო ბრალდებულს რამდენიმე წლის წინ პირობითი მსჯავრი ჰქონდა შეფარდებული იგივე ბრალის გამო.
„ბრალი უსაფუძვლოა, რადგან სასტუმრო, რომელსაც გამოძიების ვერსიით პროსტიტუციის მიზნით გამოიყენებენ, საერთოდ არ ეკუთვნის ბრალდებულს“, – ამბობს ადვოკატი ჯემალ კიკნაძე. მისი განმარტებით, მტკიცებულებების არსებობის შემთხვევაში, ბრალი შესაძლოა წარდგენილი ყოფილიყო ბრალდებულის დედის მიმართ, ვისი საკუთრებაც არის სასტუმრო. დაცვის მხარეს საქმეში წარმოდგენილი აქვს სასტუმროს ქირავნობის ხელშეკრულებაც, სადაც ხელს სასტუმროს ქირით გაცემაზე ბრალდებულის დედა აწერს.
საქმეში მთავარი მოწმეები სექსმუშაკები არიან. მათ უკვე მისცეს ჩვენებები ბრალდებულის წინააღმდეგ და თქვეს, რომ უშუალოდ მ.მ.-ს მითითებით მუშაობდნენ სასტუმროში.
ბრალის დამტკიცების შემთხვევაში, მ.მ.-ს ჯარიმის გადახდა მოუწევს, ან თავისუფლების აღკვეთა 2-დან 4-წლამდე.
