„დაგეგმე-შეასრულე-შეაფასე-დაგეგმე“ – უნივერსიტეტის რექტორობის კანდიდატი, ანთაზ ქიქავა სამოქმედო გეგმაში წერს, რომ მისი რექტორად მუშაობის მთავარი პრინციპი ეს იქნება. კანდიდატის სამოქმედო გეგმის ამოცანების ჩამონათვალიც ამით იწყება.
ეს პრინციპი ძალიან ჰგავს უმაღლესი საგანმანათლებლო დაწესებულების საგანმანათლებლო პროგრამის აკრედიტაციის თვითშფასების დოკუმენტში 5.1 პუნქტს, სადაც ვკითხულობთ: „მოქმედებს საჯაროდ ხელმისაწვდომობის ხარისხის უზრუნველყოფის სისტემა, რომელიც ითვალისწინებს „დაგეგმე-განახორციელე-შეამოწმე-განავითარეს ციკლს“.
„ბათუმელებს“ რექტორობის კანდიდატთან ანთაზ ქიქავასთან მისი სამოქმედო გეგმის და გეოგრაფიის დეპარტამენტის მუშაობის შესახებ ჰქონდა კითხვები. ანთაზ ქიქავა ამჟამად სწორედ გეოგრაფიის დეპარტამენტს ხელმძღვანელობს, სადაც 60-მდე სტუდენტი სწავლობს. როგორც დეპატამენტში „ბათუმელებს“ უთხრეს, მხოლოდ 4 სტუდენტია პირველკურსელი, მეორე კურსზე კი სულ 14 სტუდენტი სწავლობს.
თუმცა „ბათუმელებს“ რექტორობის კანდიდატთან ინტერვიუს საშუალება არ მიეცა. ანთაზ ქიქავამ „ბათუმელებთან“ საუბარი არ ისურვა. მისი თქმით, უარის ერთ-ერთი მიზეზი „ბათუმელების“ 2015 წელს გამოქვეყნებული სტატიაა – რექტორობის კანდიდატი, რომელმაც აბაშიძის დროს აჭარაში კომენდანტის საათი გამოაცხადა, სადაც აღნიშნულია, რომ ქიქავა ასლან აბაშიძის დროს სენატის თავმჯდომარე იყო და მას ეკუთვნის სიტყვები: „…ხელისუფლება ამზადებს შეიარაღებულ დაჯგუფებას აჭარაში შემოსაყვანად, რიგდება იარაღი, განსაკუთრებით აღმოსავლეთ საქართველოში. ჩვენ ამისთვის მზად უნდა ვიყოთ და ამის გამო ვაცხადებთ საგანგებო მდგომარეობას და კომენდანტის საათს, რათა დავიცვათ ჩვენი მოსახლეობა“.
ანთაზ ქიქავა სამოქმედო პროგრამაში ხაზს უსვამს იმას, რომ 35 წელია ბათუმის სახელმწიფო უნივერსიტეტში მოღვაწეობს და პროცესების უშუალო მონაწილეა. დაპირებების გრაფაში ანთაზ ქიქავა ყველაზე დიდ ნაწილს უნივერსიტეტის მირ უკვე შემუშავებული სტრატეგიული გეგმის კრიტიკას უთმობს. მისი აზრით, გეგმა დაუსრულებელი დოკუმენტის შთაბეჭდილებას ტოვებს, ზედმეტად დეტალიზებულია და გაფერმკრთალებულია ტავტოლოგიებით:
„უნივერსიტეტის განვითარების სტრატეგიულ გეგმაში ჩამოყალიბებული მიზნები ზედმეტად დეტალიზებულია და გადატვირთულია ტექსტობრივად. ამის გამო, ხშირად ძირითადი აზრი იკარგება მეორეხარისხოვან ნიუანსებში. გეგმა, რომელიც უნდა განსაზღვრავდეს განვითარების ძირითად კონცეფციას, ფერმკრთალდება ტერმინოლოგიური ტავტოლოგიებით. იქმნება ისეთი შთაბეჭდილება, თითქოს უნივერსიტეტში მიმდინარე ყველა პროცესი, მიუხედავად მისი სტატუსისა და მნიშვნელობისა, ერთიანად აისახა ერთ დოკუმენტში. გარდა ამისა, ისიც უნდა აღინიშნოს, რომ არსებული სტრატეგიული გეგმა ტოვებს დაუსრულებელი დოკუმენტის შთაბეჭდილებას. მასში არ არის ასახული დოკუმენტის შემუშავების ნორმატიული წინაპირობები, სტრატეგიული მიზნების განხორციელების ვადები და შესრულების ინდიკატორები. სტრატეგიული გეგმა დარჩება ქაღალდზე დაბეჭდილ ლამაზ დეკლარაციად, თუ მას თან არ დაერთო სტრატეგიული მიზნების მიღწევის სამოქმედო გეგმა, რომელშიც მკაფიოდ იქნება ჩამოყალიბებული მიზნების განხორციელების გასატარებელი აქტივობები, რეალისტურად შეფასებული მოსალოდნელი ფინანსური დანახარჯები, მოსალოდნელი შედეგების ინდიკატორები და შესრულებაზე პასუხისმგებელი პირები“, – ნათქვამია ანთაზ ქიქავას სამოქმედო პროგრამაში.
ცხრაგვერდიან სამოქმედო გეგმაში ანთაზ ქიქავა პრობლემების გადაჭრის გზებზეც საუბრობს. ის მართვის პროცესში აკადემიური და წარმომადგენლობითი საბჭოების, ასევე თვითმმართველობის აქტიურად ჩართვას გვპირდება. რექტორობის კანდიდატი მართვის გამჭვირვალობის უზრუნველსაყოფად ციფრული საინფორმაციო საშუალებების გამოყენებას აპირებს. კონკრეტულად როგორ და რა ფორმით, ამის შესახებ პროგრამაში არაფერია ნათქვამი.
კონკრეტიკა არ ახლავს კიდევ ერთ დაპირებას – როგორ გაგრძელდება უნივერსიტეტში დაწყებული უმაღლესი განათლების სისტემის რეფორმა. დაზუსტებული არც ისაა, რა რესურსით გეგმავს რექტორობის კანდიდატი უნივერსიტეტის სამეცნიერო პოტენციალის გაზრდას.
ანთაზ ქიქავა მიიჩნევს, რომ „პუბლიკაციების რაოდენობის გასაზრდელად არარეფერირებად გამოცემებში ნაშრომების გამოქვეყნების ტენდენციამ მიიღო შემაშფოთებელი მასშტაბები“. რექტორობის კანდიდატი კონკრეტულ გამოსავალს პროგრამაში ვერ ასახელებს და რექტორად არჩევის შემთხვევაში, აკადემიურ საბჭოს სამეცნიერო ნაშრომების შეფასების მექანიზმის პროექტს წარუდგენს.
ანთაზ ქიქავა მონაწილეობდა 2015 წლის 16 მარტის ბსუ-ს რექტორის არჩევნებში. მაშინ აკადემიურმა საბჭომ რექტორის არჩევა ვერ მოახერხა და არჩევნები გადაიდო.
ბათუმის შოთა რუსთაველის სახელმწიფო უნივერსიტეტის რექტორობის კიდევ ერთი კანდიდატი მერაბ ხალვაშია, რომელიც ამჟამად რექტორის მოვალეობას ასრულებს.
ბსუ-ს რექტორის არჩევნები 2016 წლის 18 ივლისს, 15 საათზე ჩატარდება.
