მთავარი,სიახლეები

„მათ დაპატიმრებას პოლიტიკური ნიშნით დევნად მივიჩნევთ“- მწერლების განცხადება

28.01.2024 • 4531
„მათ დაპატიმრებას პოლიტიკური ნიშნით დევნად მივიჩნევთ“- მწერლების განცხადება

თბილისში, კეკელიძის ქუჩაზე გამოსახლების საწინააღმდეგო აქციაზე დაკავებულ გიორგი ხასაიას და კაკო ჩიქობავას სოლიდარობას მწერლები და მთარგმნელები უცხადებენ.

„23 იანვარს პოლიციამ დააკავა თსუ-ს ლექტორი, ისტორიკოსი აკაკი ჩიქობავა და ილიას სახელმწიფო უნივერსიტეტის დოქტორანტი პოეტი და მთარგმნელი გიორგი ხასაია. სასამართლომ ისინი პატიმრობაში დატოვა კეკელიძის N1-იდან, უმძიმესი, ბრუტალური, ძალადობრივი ფორმებით ხატიაშვილების ოჯახის გამოსახლების წინააღმდეგ პროტესტის გამო.

მევახშეები, არაკეთილსინდისიერი გამსესხებლები, უპატიოსნოდ იყენებენ საქართველოს მოქალაქეთა მძიმე სოციალურ მდგომარეობას. მათი მიზანი არ არის ვალის დაბრუნება, არამედ გაჭირვებული მოქალაქეების ბინების მუქთად ხელში ჩაგდებაა. ხშირად, მევახშეები უარს ამბობენ ვალის დაბრუნებაზე ან რესტრუქტურიზაციაზე და უსამართლო კანონმდებლობას იყენებენ ადამიანების ერთადერთი საცხოვრისიდან გამოსასახლებლად. გამოსახლებული ოჯახები, მცირეწლოვანი და არასრულწლოვანი ბავშვები უსახლკაროდ რჩებიან.

სახელმწიფო მევახშეებს უპირატეს მდგომარეობაში აყენებს და მოქალაქეების წინააღმდეგ სახელმწიფოს ძალადობრივ პოტენციალს სრულად იყენებს.

ჩვენ გამოვდივართ მევახშეების და მევახშეობის წინააღმდეგ, ვგმობთ უსამართლო კანონს და მოქალაქეთა უკანასკნელი საცხოვრისიდან გამოსახლების არაჰუმანურ პრაქტიკას.

სრულ მხარდაჭერას ვუცხადებთ აკაკი ჩიქობავას და გიორგი ხასაიას და ვითხოვთ მათ დაუყოვნებლივ გათავისუფლებას.

განსაკუთრებით იმ ფონზე, როდესაც მთავრობასთან დაახლოებულ მოძალადეებს გირაოთი და თავდებით ათავისუფლებენ, აკაკი ჩიქობავას და გიორგი ხასაიას პატიმრობაში დატოვებას უსამართლო სისტემასთან მებრძოლი ადამიანების პოლიტიკური ნიშნით დევნად მივიჩნევთ,“ – აღნიშნულია განცხადებაში.

წერილს ხელს აწერენ:

რატი ამაღლობელი
გვანცა ჯობავა
ალექსანდრე ლორთქიფანიძე
მაია დანელია
ბექა ქურხული
გიორგი შონია
ბელა ჩეკურიშვილი
ნინო ბექიშვილი
თამთა მელაშვილი
რატი მუჯირი
გიორგი არაბული
პაატა შამუგია
მანანა მათიაშვილი
ნინო ფირცხალავა
ნუკა ღამბაშიძე
ზაალ ანდრონიკაშვილი.

მწერლების, მთარგმნელებისა და გამომცემლების ნაწილმა განცხადება 27 იანვარსაც გაავრცელა.

———————
მოძრაობა „ხმის“ წევრები, თბილისის სახელმწიფო უნივერსიტეტის საქართველოს ისტორიის ლექტორი კაკო ჩიქობავა და ილიას სახელმწიფო უნივერსიტეტის დოქტორანტი გიორგი ხასაია, 2024 წლის 23 იანვარს თბილისში, კეკელიძის ქუჩაზე, მარინა ხატიაშვილის ოჯახის გამოსახლებისას, აღსრულების ეროვნული ბიუროს მანქანის დაზიანებისთვის დააკავეს. თბილისის საქალაქო სასამართლომ მათ წინასწარი პატიმრობა შეუფარდა.

გადაბეჭდვის წესი


ასევე: