ბათუმი,მთავარი,მთიანი აჭარა,სიახლეები,ჯანმრთელობა

ხულოში თირკმლის უკმარისობის მქონე პაციენტებისთვის დიალიზის სერვისი ამოქმედდა

26.01.2024 • 31703
ხულოში თირკმლის უკმარისობის მქონე პაციენტებისთვის დიალიზის სერვისი ამოქმედდა

ხულოში თირკმლის უკმარისობის მქონე პაციენტებისთვის დიალიზის სერვისი ამოქმედდა;  დიალიზის სერვისი ასევე  ამოქმედდა ახალქალაქში, ყვარელსა და მარტვილში.

აქამდე ბენეფიციარები ამ მუნიციპალიტეტებიდან პროცედურის ჩასატარებლად, კვირაში რამდენჯერმე, კილომეტრებით დაშორებულ სხვადასხვა ქალაქში მიდიოდნენ, რაც ჯანმრთელობის გაუარესებასთან ერთად, დროსა და ხარჯებთან იყო დაკავშირებული.

ამ დროისთვის საქართველოს ბევრ მუნიციპალიტეტში დიალიზის სერვისი კვლავაც არ არის ხელმისაწვდომი. ჯანდაცვის სამინისტროს ცნობით, უახლოეს მომავალში იგეგმება ამ სერვისის ამუშავება ჭიათურაში, სენაკში, საგარეჯოში, ტყიბულში, წალენჯიხაში, ცაგერში, წნორსა და დედოფლისწყაროში.

სამედიცინო დაწესებულებები დიალიზისთვის საჭირო აპარატურით სრულად აღიჭურვა. ჰემოდიალიზის საჭიროების მქონე პირებს მედპერსონალი ყოველდღიურად მოემსახურება.

ხულოს კლინიკის ხელმძღვანელი, რუსლან აბულაძე ამბობს, რომ ამჟამად მათთან ბათუმიდან და ქობულეთიდან მოწვეული სპეციალისტები ატარებენ პროცედურებს. „ახლა დავიწყეთ, თანამშრომლების გადამზადებაც მიმდინარეობს და ორი-სამი თვის შემდეგ აქაც შევძლებთ დამოუკიდებლად, მოწვეული სპეციალისტების გარეშე ჩავატაროთ პროცედურა“, – ამბობს ის.

„ამჟამად ხულოში ორი პაციენტია პროგრამულად, მთლიანობაში კი რაიონში სულ 19 ადამიანია, ვინც იკეთებს დიალიზს, მაგრამ ბევრი საცხოვრებლად გადასულია ბათუმში, ზოგი ალბათ დაბრუნდება. როგორ იქნება, ვნახოთ; გამგეობიდანაც იფარებოდა მათი გზის ხარჯი. 19-დან ორი ადგილზე გვყავს. შუახევიდანაც არის ერთი პაციენტი დაინტერესებული“, – ამბობს რუსლან აბულაძე.

გადაბეჭდვის წესი


ასევე: