მთავარი,სიახლეები

სოფელ გელაძეებსა და პაქსაძეებში გზა გაიპო – მეწყერი ხულოში

25.01.2024 • 3273
სოფელ გელაძეებსა და პაქსაძეებში გზა გაიპო – მეწყერი ხულოში

ხულოს რამდენიმე სოფელში მეწყერი განვითარდა. მეწყერმა დააზიანა სოფელ გელაძეებისა და პაქსაძეების დამაკავშირებელი ცენტრალური გზა. სოფელ პაქსაძეებში საფრთხე შეექმნა 7 ოჯახს.

პარტია „საქართველოსთვის“ წარმომადგენელი ხულოს საკრებულოში, ირაკლი ბოლქვაძე იმყოფებოდა სოფელ გელაძეებში, რომელიც ამბობს, რომ მეწყერი გელაძეების გარდა მის მომიჯნავე სოფელ კორტოხშიც არის განვითარებული.


მიწის ჩამოშლილი მასა გელაძეებში.

„სავალალო მდგომარეობაა ამ სოფლებში. მოსახლეობა შეშფოთებულია, რადგან მიწის დიდი მასა წამოვიდა პაქსაძეების მხარეს. მოსახლეობა დაზიანებულ გზაზე გადაადგილდება ისევ, რადგან სხვა ალტერნატივა არ აქვთ“, – ამბობს ბოლქვაძე.

„ბათუმელები“ ამ სოფლებში მერის წარმომადგენელს, გურამ კახაძესაც ესაუბრა. მისი თქმით, 7 ოჯახი სოფელ პაქსაძეებიდან უსაფრთხო ადგილზეა გადაყვანილი, სოფელ გელაძეებში კი ამ ეტაპზე მოსახლეობის გაყვანის საჭიროება არ დგას.


მეწყერი ხულოში

ვესაუბრეთ ხულოს მერიასაც. მერიის პრესსამსახურში აცხადებენ, რომ ყველაზე მეტად დაზიანებულია სოფლებს შორის დამაკავშირებელი გზა.

„თავის დროზე გეოლოგებმა მოგვცეს დასკვნა, რომ თავი შეიკავეთ გზის გახსნისგანო, რადგან აქტიური იყო მეწყერი. ამის შემდეგ რა შეიძლება გაკეთდეს, ეს ალბათ საგზაო დეპარტამენტმა უნდა გადაწყვიტოს“, – გვითხრეს პრესსამსახურში.

ამ დროისთვის მოსახლეობა მხოლოდ ფეხით გადაადგილდება გზაზე.

____________

მთავარი ფოტო: ხულო/სოფელ გელაძეებისა და პაქსაძეების დამაკავშირებელი გზა.

გადაბეჭდვის წესი


ასევე: