მკვლელობაში ბრალდებული კაცი ნაფიცმა მსაჯულებმა ბათუმში დღეს, 22 იანვარს გაამტყუნეს. მას მოსამართლე თამარ ბეჟანიშვილმა 10 წლით თავისუფლების აღკვეთა შეუფარდა.
ეს პირველი შემთხვევაა ბათუმში, როცა ნაფიცი მსაჯულების სასამართლომ გამამტყუნებელი ვერდიქტი მიიღო. ნაფიცი მსაჯულები 2022 წელსაც შეიკრიბნენ ბათუმში და გამამართლებელი განაჩენი მიიღეს.
ნაფიცი მსაჯულების მიერ გასამართლებული მკვლელობაში ბრალდებული, მოლდოვის მოქალაქე სერგეი სკაუნია. ის გამამართლებელ განაჩენს ითხოვდა და საქმის განმხილველად ნაფიცი მსაჯულები აირჩია.
საუბარია 2023 წლის აპრილში ხელვაჩაურში, სოფელ განთიადში მომხდარ შემთხვევაზე – 37 წლის კაცი ღამით მოკლეს. მკვლელობაში ბრალდებული გარდაცვლილის მეგობარი იყო, ისინი მშენებლობაზე სამუშაოდ ჩამოვიდნენ ბათუმში.
„ის არ აღიარებდა დანაშაულის ჩადენას, რადგან ეს იყო თავდასხმა. ჩვენ ვითხოვდით გამართლებას ან მოგერიების ფარგლებს გადაცილებას,“ – ამბობს ადვოკატი გვანცა თურმანიძე, ის მკვლელობაში ბრალდებულის ინტერესებს იცავდა.
ნაფიცი მსაჯულების რეკომენდაცია ამ საქმეზე იყო ის, რომ მოსამართლეს მკაცრი სასჯელი არ დაენიშნა.
ამ ეტაპზე ბათუმის საქალაქო სასამართლოში კიდევ ერთი საქმის განსახილველად არჩევენ ნაფიც მსაჯულებს.
ამ თემაზე:
