„რა მოხდა იმ საღამოს?“ – ჰკითხა მოსამართლე კოტე ჭილაიმ მკვლელობაში ბრალდებულ სერგეი ს.-ს, ვიდრე მას აღკვეთი ღონისძიების სახით პატიმრობას შეუფარდებდა.
ხელვაჩაურში, სოფელ განთიადში, 37 წლის კაცი მისმა მეგობარმა 23 აპრილის ღამით მოკლა. აღკვეთი ღონისძიების შეფარდების პროცესი ბათუმის საქალაქო სასამართლოში დღეს, 25 აპრილს, გაიმართა. ბრალდებული და ის კაცი, რომელიც მოკლეს, მეგობრობდნენ. ისინი მშენებლობაზე სამუშაოდ მოლდოვიდან ჩამოვიდნენ.
„…მე მთელი დღე ვმუშაობდი, ვასხამდი ბეტონს. ის კი იმ დღეს გვიან დაბრუნდა სახლში, ღამის 12 იქნებოდა,“ – ფეხზე წამოდგა ბრალდებული გისოსებს მიღმა და ისე დაიწყო შემთხვევის აღწერა.
„დაღლილი ვიყავი და ჩამეძინა. ალექსანდრე ოთახში შემოვიდა ხმაურით, ტელეფონში ჰქონდა ჩართული მუსიკა და დივანზე დაჯდა, ეწეოდა…
ვთხოვე, რომ მუსიკისთვის ჩაეწია, რადგან მეძინებოდა. ის გაბრაზდა, გინება დამიწყო, ხელების ქნევა. ვკითხე, სად წაიღო ჩემი მობილური ტელეფონი და პასპორტი, რაც მანამდე წაიღო. მან პასუხის გაცემის ნაცვლად, გაშლილი ხელი დამარტყა სახეში.
დივნის გვერდით ინსტრუმენტები ეწყო… მე მას სამჯერ ჩავარტყი ჯოხი…
მერე მეზობელთან წავედი, ვინც ყველაზე ახლოს ცხოვრობს და ვუთხარი, რომ სასწრაფოს გამოძახება მინდოდა… ჩემი მიზანი არ იყო მისი მოკვლა, მივედი პოლიციაში ჩემით და ვაღიარე დანაშაული,“ – დაასრულა თხრობა ბრალდებულმა.
სერგეი ს.-ს თქმით, ის საქართველოში სამუშაოდ 3 თვის წინ ჩამოვიდა.
„არსებობს რისკი, რომ ზეგავლენა მოახდინოს მოწმეებზე“, – თქვა პროკურორმა და აღკვეთი ღონისძიების სახით ბრალდებულისთვის პატიმრობის შეფარდება მოითხოვა.
ადვოკატმა ლია მაისურაძემ კი მოსამართლეს უთხრა, რომ ბრალდებულის მიმალვის საფრთხე არ არსებობს. მან მოსამართლეს ბრალდებულის 10 ათასი ლარი გირაოს საფუძველზე გათავისუფლება შესთავაზა.
„…იქ არავითარი მოწმე არ იყო, სოფელში მოხდა ეს ამბავი, შეეძლო მიეტოვებინა შემთხვევის ადგილი და ქვეყანაც, დარჩებოდა დანაშაული გაუხსნელი… მაგრამ ის მეზობელთან მივიდა და სასწრაფოს გამოძახება ითხოვა“, – აღნიშნა ადვოკატმა ლია მაისურაძემ.
„თუმცა მან არ იცოდა დამდგარი შედეგი,“ – ადვოკატს მიმართა მოსამართლემ და ბრალდებულს პასპორტის, ასევე მობილური ტელეფონის შესახებ ინფორმაციის დაზუსტება სთხოვა.
„…მან პასპორტი დამიბრუნა, მობილური ტელეფონი კი – არა,“ – მხოლოდ ეს დასძინა ბრალდებულმა.
ბრალის დადასტურების შემთხვევაში, სერგეი ს.-ს 10-დან 15 წლამდე თავისუფლების აღკვეთა ელის.
