ებრაელები მთავარ დღესასწაულს – ხანუქას აღნიშნავენ მთელ მსოფლიოში. ეს ებრაული დღესასწაული სიმბოლოა გამბედაობის, შეუპოვრობისა და სიკეთის ბოროტებაზე გამარჯვების.
ისრაელის საელჩოს ოფიციალურ ფეისბუქგვერდზე ნათქვამია, რომ საქართველოში ისრაელის ელჩმა, ჰადას მეიცადმა, ხანუქას პირველი სანთელი მიუძღვნა 7 ოქტომბერს ჰამასის მიერ ღაზაში გატაცებული ბიბასების ოჯახის უსაფრთხო დაბრუნებას.
„ოჯახის ყველაზე პატარა წევრი, კფირ ბიბასი, რომელიც მალე 11 თვის გახდება, უკვე ორი თვეა ტერორისტების მძევალია. ჰამასის ტერორისტებმა კფირი და მისი 4 წლის ძმა არი დედასთან ერთად გაიტაცეს. ოჯახი სისხლიან შაბათს ისრაელის წინააღმდეგ განხორციელებული ძალადობის სიმბოლოდ იქცა.
…მათი უდანაშაულო სახეები, როდესაც ისინი დედის ხელებში მყოფნი გაუჩინარდნენ ღაზაში, ყველას გვაწუხებს“, – განაცხადა ელჩმა.
პრემიერ-მინისტრმა ღარიბაშვილმა და ელჩმა მეიცადმა რაბინებთან, საქართველოს ებრაული თემის წევრებთან და დიპლომატიური კორპუსის წარმომადგენლებთან ერთად აანთეს დღესასწაულის პირველი სანთელი.
ხანუქას დღესასწაული 15 დეკემბრამდე აღინიშნება. წელს დღესასწაულის მთავარი გზავნილია სოლიდარობის კამპანია – ბიბასების ოჯახის გათავისუფლების მოთხოვნა.
„იერუსალიმ პოსტი“ წერს, რომ ისრაელის საგარეო საქმეთა მინისტრმა, ელი კოენმა, ისრაელის ყველა საელჩოსა და საკონსულოს დაავალა, რომ შენობები ნარინჯისფრად გაანათონ ან ბიბასების ოჯახის ფოტოები გამოფინონ.
_______________
ფოტო: ისრაელის საელჩო საქართველოში/facebook
