მთავარი,სიახლეები

ხულოს სოფელ დანისპარაულში ახალ სკოლას ააშენებენ – გამოყოფილია 4 მილიონი

03.12.2023 • 682
ხულოს სოფელ დანისპარაულში ახალ სკოლას ააშენებენ – გამოყოფილია 4 მილიონი

ხულოს მუნიციპალიტეტის სოფელ დანისპარაულში ახალი საჯარო სკოლის მშენებლობაა დაგეგმილი, რისთვისაც აჭარის ბიუჯეტიდან 4,1 მილიონი ლარია გამოყოფილი. ახალი შენობა ორსართულიანი იქნება და მის მშენებლობაზე ტენდერი გამოცხადებულია.

მშენებლობა სახელმწიფო საკუთრებაში არსებულ მიწის ნაკვეთზეა დაგეგმილი, რომელიც ბათუმი-ახალციხის ავტომაგისტრალიდან 87 მეტრში მდებარეობს.

მშენებლობაზე თანახმაა საქართველოს საავტომობილო გზების დეპარტამენტი, ოღონდ იმ შემთხვევაში, თუ მკაცრად იქნება დაცული შესაბამისი პირობები [საჯარო სკოლის ადგილმდებარეობა, კმ და პკ, საავტომობილო გზის ღერძის მიმართ დაშორება და სხვა].

„წინააღმდეგ შემთხვევაში საჯარო სკოლის მოწყობასთან დაკავშირებით, დეპარტამენტის მიერ გაცემული შეთანხმება ჩაითვლება გაუქმებულად“ – აღნიშნულია დეპარტამენტის მიერ ხულოს მერიაში გაგზავნილი წერილში.

ამასთან, სამომავლოდ „საავტომობილო გზის ამ მონაკვეთის მოდერნიზაციის, რეკონსტრუქციის ან რეაბილიტაციის შემთხვევაში, თუ ამას საჭიროება მოითხოვს, საჯარო სკოლის დემონტაჟი მოხდება მოქმედი კანონმდებლობის შესაბამისად“ – აღნიშნულია დეპარტამენტის წერილში.

სოფელ დანისპარაულის საჯარო სკოლის ახალი შენობის მშენებლობაზე ტენდერი აჭარის განათლების სამინისტრომ უკვე გამოაცხადა. სატენდერო თანხა 4 მილიონ 113 ათას 255 ლარია.

სამინისტროს სატენდერო კომისიის ოქმის მიხედვით, დაგეგმილ მშენებლობაზე სავარაუდო ფასის დადგენის მიზნით ინფორმაცია 9 კომპანიას მიაწოდეს, მაგრამ არავინ დაინტერესებულა: „ბაზრის კვლევის ფარგლებში ინფორმაცია გაეგზავნა 9 კომპანიას, თუმცა მათგან რაიმე წინადადებები და შენიშვნები არ იქნა წარმოდგენილი“.

აქედან გამომდინარე, როკორც ოქმშია აღნიშნული, „შეისწავლეს 3 ანალოგიური ტენდერი, რომლის შედეგად დადებული ხელშეკრულების ღირებულება შეადგენს, ან არაუმეტეს 20%-ით აღემატება/ნაკლებია გამოსაცხადებელი ელექტრონული ტენდერის სავარაუდო ღირებულებაზე, ასევე რომელშიც მონაწილეობა მიიღო, არანაკლებ ორმა პრეტენდენტმა და ახალი ელექტრონული ტენდერის გამოცხადებამდე არაუგვიანეს 12 თვით ადრე მიენიჭა სტატუსი – „ხელშეკრულება დადებულია“.

ოქმში ისიცაა, აღნიშნული, რომ ეს ტენდერები „განხორციელებულია სხვა შემსყიდველების მიერ, თუმცა სამუშაობის ჩატარების ადგილი არის ბათუმის, მარტვილის და ჩოხატაურის მუნიციპალიტეტები, რაც ტერიტორიულად ახლოს მდებარეობს წინამდებარე ტენდერით გათვალისწინებულ ობიექტთან“-ო.

ამ „კვლევის, შესყიდვის სავარაუდო ღირებულების, შესყიდვის მოცულობისა და სპეციფიკის (მაღალმთიანი რეგიონი) გათვალისწინებით“ განისაზღვრა პრეტენდენტის გამოცდილებასთან დაკავშირებული მოთხოვნებიცო – აღნიშნულია ოქმში.

ტენდერში მონაწილე პრეტენდენტისადმი ერთ-ერთი მთავარი სატენდერო მოთხოვნა კი მისი გამოცდილებაა.

„შესყიდვაში მონაწილეობის მსურველ პირს 2020 წლის 1-ლი იანვრიდან ტენდერის გამოცხადებამდე პერიოდში, საქართველოს ტერიტორიაზე ან/და სხვა ქვეყნის ტერიტორიაზე (გარდა იმ ქვეყნის ტერიტორიისა, სადაც რეგისტრირებულია პრეტენდენტი) შესრულებული უნდა ჰქონდეს შენობის/ნაგებობის მშენებლობის/რეაბილიტაციის სამუშაოების (გამოცდილებაში არ ჩაითვლება გზების, ხიდების, გაბიონების, საყრდენი კედლების, სანიაღვრე არხების, ეზოების, ქუჩების მოწყობის/რეაბილიტაციის და მსგავსი სამუშაოები, გარდა იმ შემთხვევისა, თუ ეს სამუშაოები სხვა ძირითადი სამუშაოების თანმდევი სამუშაოებია), მიწოდება საერთო ღირებულებით არანაკლებ 2 056 627 ლარის, მათ შორის ერთი შესყიდვის ფარგლებში არანაკლებ 1 028 313 ლარის ღირებულების სამუშაოები.“ – აღნიშნულია ტენდერის პირობაში.

წინადადებების მიღება ტენდერში 2023 წლის 20 დეკემბერს დაიწყება და 25 დეკემბერს დასრულდება.

სამუშაოები ტენდერში გამარჯვებულთან ხელშეკრულების დადებიდან 24 თვის ვადაში უნდა დამთავრდეს.

დანისპარაულის სკოლის ვიზუალიზაცია / ფოტო პროექტიდან

„საპროექტო შენობა წარმოადგენს ორი სართულის მქონე სკოლის შენობას, რომელიც წარმოდგენილია ორ ბლოკად, პირველი ბლოკი განკუთვნილია სპორტული დარბაზისთვის, ხოლო მეორე ბლოკში განთავსებულია: სასწავლო, სამერუნეო და სხვა სივრცეები. სასწავლო სივრცე განლაგებულია ტერიტორიის ჩრდილოეთ ნაწილში, სპორტ-დარბაზი კი – სამხრეთით.

ეზოს ძირითადი ტერიტორია ვრცელდება დასავლეთ ნაწილში, რომელიც მოეწყობა მოსწორებულ ტერასაზე. ტერიტორიის ჩრდილოეთ ნაწილში განსაზღვრულია საქვაბეს მოწყობა, ხოლო სამხრეთ-აღმოსავლეთ ნაწილში მინი სპორტული მოედანის.

ტერიტორიის მთელი ზედაპირი გარდა მისასვლელი გზისა დაიფარება დეკორატიული ფილებით, ხოლო გზის ზედაპირი ბეტონის საფარით“ – აღნიშნულია პროექტში.

გეოლოგიურ დასკვნაში კი აღნიშნულია, რომ სკოლის ტერიტორია არის „ძველმეწყრული ფერდი, რომელიც დღესდღეობით დასტაბილიზირებულია“ და „აუცილებელი პირობაა ზედაპირული და ნაწრეტი წყლების უსაფრთხო ადგილას გაყვანა“ შესაბამისი კომუნიკაციის მოწყობით:

გეოლოგიური დასკვნიდან

დანისპარაულის ახალი სკოლის ვიზუალიზაცია / ფოტო პროექტიდან

ამავე თემაზე:

როცა გარეთ 2 მეტრი თოვლია – ამბები გოდერძიდან და დანისპარაულიდან | ფოტო/ვიდეო

 

 

გადაბეჭდვის წესი


ასევე: