მთავარი,სიახლეები

ბათუმში შტორმის დროს მოზარდი დაშავდა

30.11.2023 • 2690
ბათუმში შტორმის დროს მოზარდი დაშავდა

ბათუმში 27 ნოემბერს ძლიერი შტორმის დროს ზღვასთან ახლოს, პირსზე მდგომი ორი მოზარდიდან ერთ-ერთი დაშავდა.

ინფორმირებული წყაროს ცნობით, მოზარდმა ტალღის დარტყმის შედეგად მენჯ-ბარძაყის მოტეხილობა მიიღო.

შტორმში მოხვედრილი მოზარდების ამსახველი ვიდეო სოციალურ ქსელებშიც გავრცელდა. კადრებში ნათლად ჩანს, ტალღის ძლიერი დარტყმის შედეგად როგორ ეცემა ძირს ორი ადამიანი.

ძლიერი შტორმის დროს პირსზე მდგომი ორი ადამიანიდან ერთ-ერთი დაშავდა.

მოზარდები პირსის მოაჯირმა შეაკავა და ასე გადაურჩნენ ზღვაში ჩავარდნას.

მოზარდის დაშავების ფაქტი შსს-შიც დაგვიდასტურეს.

გამოძიება დაწყებულია სსკ-ის 124-ე მუხლით, რაც ჯანმრთელობის ნაკლებად მძიმე ან მძიმე დაზიანებას გულისხმობს გაუფრთხილებლობით.

ბათუმში, შავ ზღვაზე, დაახლოებით 8-ბალიანი შტორმი 27 ნოემბერს დაფიქსირდა. შტორმმა ზიანი მიაყენა ბულვარის და სანაპირო ზოლის ინფრასტრუქტურას, დაიტბორა სანაპიროსთან ახლოს ქუჩების ნაწილიც.

ბათუმის ბულვარმა შტორმული გაფრთხილების შესახებ დღის მეორე ნახევარში გააკეთა განცხადება ფეისბუქში, თუმცა მოქალაქეების ნაწილი მაინც იმყოფებოდა ზღვის სანაპიროსთან ახლოს.

 

მთავარი ფოტო: შტორმი ბათუმში / 27.11.2023

გადაბეჭდვის წესი


ასევე: