მთავარი,სიახლეები,ჯანმრთელობა

აჭარაში უშვილობის მკურნალობის პროგრამით ბაღისა და სკოლის თანამშრომლებიც ისარგებლებენ

29.11.2023 • 3241
აჭარაში უშვილობის მკურნალობის პროგრამით ბაღისა და სკოლის თანამშრომლებიც ისარგებლებენ

2024 წლიდან აჭარაში „უშვილობის დიაგნოსტიკისა და მკურნალობის“ პროგრამის ბენეფიციართა ჩამონათვალი ფართოვდება.

2024 წელს პროგრამით სარგებლობა სკოლამდელ და ზოგადსაგანმანათლებლო დაწესებულებებში დასაქმებულ პერსონალსაც შეეძლება.

აჭარაში „უშვილობის დიაგნოსტიკისა და მკურნალობის“ პროგრამა 2022 წლის ივლისში ამოქმედდა. თავიდან ბენეფიციარებს წარმოადგენდნენ შშმ სტატუსის ან 200 000-მდე სარეიტინგო ქულის მქონე ადამიანები, შემდეგ ქულა 300 000-მდე გაიზარდა. მომავალი წლიდან პროგრამით სარგებლობას შეძლებენ სკოლამდელი და ზოგადსაგანმანათლებლო დაწესებულებებში დასაქმებული  პედაგოგები და სხვა დასაქმებული პირები.

„2024 წლიდან დასაფინანსებელ ბენეფიციარებს დაემატება ზოგადსაგანმანათლებლო დაწესებულებებში დასაქმებული პერსონალი, ამის პარალელურად გრძელდება დაფინანსება შშმ სტატუსის მქონე პირებისთვის და პირებისთვის, რომელთაც აქვთ 300 000-მდე სარეიტინგო ქულა (წყვილიდან ერთ-ერთი მაინც უნდა აკმაყოფილებდეს ამ კრიტერიუმებს)” – ამბობს აჭარის ჯანდაცვის მინისტრის პირველი მოადგილე მარი ზანაქიძე.

პროგრამის ბენეფიციარები ბოლო ერთი წლის განმავლობაში უნდა იყვნენ რეგისტრირებულნი აჭარაში და ასევე, უნდა იყვნენ ოფიციალურ ქორწინებაში მინიმუმ ბოლო 6 თვის განმავლობაში.

„ეს ორი ცვლილება ძალაში შევიდა აგვისტოდან, იქამდე იყო 2 წელი აჭარაში რეგისტრაციის ვადა და ერთი წელი – ქორწინების, მაგრამ ხშირად არის, რომ ჯვრისწერის შემდგომ, ან ისე, არაოფიციალურ ქორწინებაში არიან ხანგრძლივად მოქალაქეები; თან ეს ის კატეგორიაა წყვილების, რომელთაც მაღალი ასაკობრივი კატეგორია აქვთ და მეტი დრო რომ არ დაეკარგათ, შევამცირეთ ეს ვადა“ – ამბობს მინისტრის მოადგილე.

2024 წლისთვის პროგრამის ბიუჯეტი 700 000 ლარი იქნება.  პროგრამაში ჩართული ყველა ბენეფიციარისთვის გათვლილია ვაუჩერული დაფინანსება – მაქსიმუმ 10 000 ლარის ოდენობით.

მარი ზანაქიძე განმარტავს, რომ დაფინანსება ხდება შესრულებული სამუშაოს მიხედვით: „შეიძლება რაღაც მიზეზით შეწყდეს მკურნალობა, მაგალითად, დადგეს ორსულობა ინვიტრო განაყოფიერებამდე და არ გახდეს საჭირო სრული თანხის დახარჯვა“.

„თუ ინვიტრო განაყოფიერების შემთხვევაში, პირველი გადატანის შემდეგ არ დადგება ორსულობა, განმეორებით პაციენტს უფინანსდება გადატანის თანხა – 3000 ლარი, რადგან სხვა სამედიცინო პროცედურები უკვე ჩატარებული აქვს და ორგანიზმი მომზადებული აქვს ორსულობისთვის“ – ამბობს მინისტრის მოადგილე.

პროგრამით ფინანსდება საქართველოში არსებულ რეპროდუქტოლოგიურ კლინიკებში მკურნალობა.

აჭარის ჯანდაცვის სამინისტროს ინფორმაციით, აჭარაში ამ პროგრამის ფარგლებში დაიბადა 10 ბავშვი, ამჟამად შვილს ელოდება 15 წყვილი.

ამავე თემაზე: 

ბინა გავყიდე, რომ მკურნალობის თანხა მქონოდა – უშვილობა, ანუ ჯანდაცვის სისტემის უხილავი დიაგნოზი

გადაბეჭდვის წესი


ასევე: