21 ნოემბერს, ბათუმის დამოუკიდებელი ცხოვრების ცენტრში, USAID საქართველოსა და ცენტრის თანამშრომლობისადმი მიძღვნილი ღონისძიება გაიმართა. შეხვედრას ესწრებოდნენ USAID-ის მისიის ხელმძღვანელი ჯონ პენელი, ცენტრის ხელმძღვანელი რამინ მაჭარაშვილი, ბათუმის მერიის წარმომადგენლები და ცენტრის 10-მდე ბენეფიციარი.
ბათუმის დამოუკიდებელი ცხოვრების ცენტრი შშმ პირების მიერ დაფუძნებული, შშმ პირთა და ოჯახის წევრთა უფლებადამცველი ორგანიზაციაა.
USAID-ის პროგრამის – „დამოუკიდებელი ცხოვრების პროგრამა საქართველოში“ მიზანია შეზღუდული შესაძლებლობის მქონე პირთა დამოუკიდებელი ცხოვრების ხელშეწყობა მტკიცებულებებზე დაფუძნებული ადვოკატირებისა და მდგრადი მომსახურების მიწოდების გზით.
შეხვედრაზე გაჟღერდა ცენტრის ხელმძღვანელისა და ბენეფიციარების მოსაზრებები ცენტრის მიღწევებისა და გამოწვევების შესახებ. ცენტრის ბაზაზე არსებობს მშობლების კლუბიც, სადაც შშმ პირთა მშობლები ერთმანეთს უზიარებენ ცოდნასა და გამოცდილებას.
ცენტრის ხელმძღვანელის, რამინ მაჭარაშვილის თქმით, ცენტრი სხვადასხვა სერვისებზე წვდომის გაზრდასთან ერთად იკვლევს შშმ ადამიანების საჭიროებებსაც და უზიარებს რეკომენდაციებს ადგილობრივ ხელისუფლებას.
„ის პრობლემები, რაც დგას აჭარაში შეზღუდული შესაძლებლობების მქონე პირების წინაშე, მიგვაქვს შესაბამის ადრესატებთან. ჩვენ სისტემატურ შეხვედრებს ვმართავთ ბათუმის მერიის შესაბამის უწყებებთან. მაგალითად, ბათუმის ავტოტრანსპორტთან წლებია უკვე ვთანამშრომლობთ და ვუწევთ კონსულტაციებს სხვადასხვა საკითხზე.
მაგალითად, ჩვენი ჩართულობით მოხდა ადაპტირებული ტრანსპორტის შემოყვანა და გაჩერებებისთვის ხმოვანი სისტემის დანერგვა.
ასევე, ბათუმის პლაჟი წლების განმავლობაში იყო მიუწვდომელი ეტლით მოსარგებლეებისთვის და ბოლო 2-3 წელია ამ კუთხით პროგრესი გვაქვს, რამდენიმე ლოკაცია არის უკვე პლაჟზე, სადაც ეტლით მოსარგებლეს შეუძლია ზღვაში შესვლა.
მიუხედავად იმისა, რომ ფიზიკური გარემო უფრო მეტად ადაპტირებული ხდება შშმ პირებისთვის, ჯერ კიდევ ბევრი რამეა ამ მხრივ გასაკეთებელი. მაგალითად, ტროტუარების ადაპტირება, რადგანაც ხშირად ბორდიური მაღალია და ეტლით მოსარგებლე ადამიანები, მათ შორის დედები, რომლებსაც ბავშვები დაჰყავთ ეტლით, ვერ ადიან სავალი ნაწილიდან ტროტუარზე“ – ამბობს რამინ მაჭარაშვილი.
რამინ მაჭარაშვილი
შეხვედრაზე შშმ ბავშვების მშობლებმა ისაუბრეს იმ შესაძლებლობებზე, რასაც ცენტრი მათ და მათ შვილებს აძლევს.
„ჩვენთვის მნიშვნელოვანია დამოუკიდებელი ცხოვრების ცენტრის არსებობა, რადგან მთელ რიგ პრობლემებს ვაწყდებით ყოველდღიურ ცხოვრებაში. სწორედ ეს ცენტრი გვეხმარება ამ პრობლემების აღმოფხვრაში და დიდ დახმარებას გვიწევს ჩვენ, მშობლებს. ეს იქნება ფსიქოლოგიური დახმარება, მორალური თუ ასე შემდეგ“ – ამბობს ნათია მსხალაძე.
სოფიკო მარკოიძე, ნატალი დავითაძე და ნათია მსხალაძე
შეხვედრას ესწრებოდა USAID-ის მისიის ხელმძღვანელი ჯონ პენელი.
„მოხარული ვარ, რომ ვიმყოფები ბათუმის დამოუკიდებელი ცხოვრების ცენტრში. ეს არის ერთ-ერთი იმ ექვსი ცენტრიდან, რომელსაც ჩვენ ვუჭერთ მხარს. ეს ცენტრი მნიშვნელოვანია იმიტომ, რომ აწვდის ინფორმაციას და რესურსებს, რაც ძალიან მნიშვნელოვანია შეზღუდული შესაძლებლობის მქონე ადამიანებისთვის და საზოგადოებას უზიარებს ინფორმაციას, რაც საჭიროა ამ მხრივ ცნობიერების გასაზრდელად.
USAID-ი ამაყობს, რომ 30 წელზე მეტია მხარს უჭერს საქართველოს გაძლიერებას ეკონომიკისა და უსაფრთხოებისა და დემოკრატიის კუთხით, ამაში კი ჩართული უნდა იყვნენ შეზღუდული შესაძლებლობის პირებიც და ეს პროცესი მთლიანად ინკლუზიური უნდა იყოს. მოხარულები ვართ, რომ მხარს ვუჭერთ ამ პროგრამას” – აღნიშნა ჯონ პენელმა.
ჯონ პენელი
„USAID-ის დახმარებით მოხდა საქართველოში ამ მოდელის შემუშავება. ეს ცენტრები გამოირჩევა იმით, რომ თვით შეზღუდული შესაძლებლობების მქონე პირებს და მშობლებს, რომელთაც ჰყავთ შეზღუდული შესაძლებლობების მქონე შვილები, შეუძლიათ დაეხმარონ ადამიანებს სხვადასხვა სერვისების მიღების კუთხით.
ეს გულისხმობს როგორც განათლების მიღებას, ასევე დასაქმებას და ჯანმრთელობის სერვისებთან დაკავშირებულ საკითხებს, ყველაფერს, რაც ესაჭიროება ადამიანს ნორმალური ცხოვრებისათვის. ასეთი ცენტრი საქართველოში არის 6 და ეს ცენტრები სრულად არის შესაბამისობაში საქართველოს კანონმდებლობასთან, ამ ცენტრების მოდელის შემუშავება ჯანდაცვის სამინისტროსთან და საქართველოს მთავრობასთან ერთად მოხდა.
სწორედ ამ ცენტრების მოდელის მიხედვით შემუშავდა ჯანდაცვის სამინისტროს მიერ სტანდარტები და აუცილებლად უნდა იყოს გახსნილი მსგავსი ცენტრი ყველა მუნიციპალიტეტში” – ამბობს თამარ სირბილაძე, USAID-ის ადამიანის უფლებათა დაცვისა და მდგრადი განვითარების მიმართულების ხელმძღვანელი.
თამარ სირბილაძე
